Azərbaycan, Bakı, 10 noyabr / Trend , müxbir Ü.İsmayılova/
Azərbaycanda yanvar - oktyabr ayları üzrə inflyasiyanın səviyyəsi, illik hesablamaya görə, 27,02 faiz təşkil edib. Bazar ertəsi "İqtisadi Tədqiqatlar Mərkəzi" qeyri - hökumət təşkilatından bu barədə bildiriblər. Yanvar-aprel ayları ərzində istehlakçı qiymətlərinin indeksinin artım tempi 18,85 faiz olub.
Oktyabrda Azərbaycanda istehlakçı qiymətlərinin indeksi 1,22 faiz, Bakıda - 0,42 faiz, bölgələrdə - 2,01 faiz təşkil edib. Ay ərzində ərzaq məhsulları 1,29 faiz, qeyri - ərzaq məhsulları 1,46 faiz, xidmətlər 0, 74 faiz bahalaşıb.
Monitorinqlər nəticəsində məlum olub ki, ərzaq məhsulları üzrə ən çox artım kartofun (28,13 faiz), üzümün (23,42 faiz), xiyarın (16,22 faiz), yumurtanın (8,25 faiz) qiymətində müşahidə edilib. Qeyri - ərzaq məhsulları arasında artım kərpicin qiymətində (3,49 faiz) nəzərə çarpıb.
Ucuzlaşma buğda ununun (12,79 faiz), limonun (9,73 faiz), bulka məhsulları (6,65 faiz), makaron (3,9 faiz) və sementin (2,64 faiz) qiymətlərində müşahidə edilib.
QHT-nin hesablamalarına görə, oktyabrda əməkqabiliyyətli əhali üçün minimal istehlak səbətinin həcmi 109,84 manat, 15 yaşınadək uşaqlar üçün 100, 22 manat, təqaüdçülər üçün 81,61 manat təşkil edib.
Məqalə müəllifilə əlaqə ünvanı: [email protected]
