Azərbaycan, Bakı, 10 dekabr/ Trend , müxbir İ.Xəlilova/ "Azərbaycan Milli Bankı (AMB) dünya maliyyə böhranına müqavimət məqsədilə hökumətlə birlikdə genişləndirilmiş preventiv idarəetmə proqramı hazırlayır", - AMB-nin Kredit Təşkilatlarının Fəaliyyətinə Nəzarət Departamentinin direktoru Rəşad Orucov çərşənbə günü bildirib.
"Proqramda Milli Bankın 2007-ci ilin sonundan başladığı preventiv tədbirlərin davamı nəzərdə tutulub, - Orucov deyib. - Proqramın yaxın vaxtlarda qəbul ediləcəyi gözlənilir".
Onun sözlərinə görə, Milli Bank dünya maliyyə böhranı şəraitində Azərbaycanda likvidliyin tənzimlənməsi üçün bank sisteminə əlavə 350 mln. manat likvidliyi təmin etmiş preventiv tədbirlər görüb.
2008 - ci ilin oktyabrından başlayaraq, AMB-nin təkrarmaliyyələşdirmə dərəcəsi illik 15 faizdən 8 faizədək, milli və xarici valyutada bank öhdəlikləri üzrə məcburi ehtiyat normaları 12 faizdən 6 faizədək, xarici öhdəliklər üzrə məcburi öhdəliklər norması 5 faizdən sıfıradək azaldılıb.
Bank sektorunda maliyyə təhlükəsizliyi səviyyəsinin artırılması məqsədilə, 2008-ci il ərzində Milli Bank tərəfindən prudensial tənzimləmə üzrə də tədbirlər görülüb. Bu proqram çərçivəsində AMB aktivlərin təsnifatı üzrə dərəcələri sərtləşdirib: nəzarət altında olan aktivlər üzrə dərəcələr 6 faizdən 10 faizədək, qənaətbəxş olmayan aktivləri üzrə 25 faizdən 30 faizədək, təhlükəli aktivlər üzrə 50 faizdən 60 faizədək artırılıb. Bundan başqa, kreditlərin alınması zamanı daşınmaz əmlakla təminat üzrə tələblər 120 faizdən 150 faizədək artırılıb, birinci səviyyənin kapitalında subordinasiya edilmiş borcun maksimal məbləğinə məhdudiyyətlər tətbiq edilib - belə borc 50 faizədək ola bilər.
"Son 15 ildə Azərbaycanın bank sektoru 10 dəfədən çox artıb ki, bu da bir nəzarət orqanı kimi AMB-də artan risklərlə əlaqədar narahatlıq doğurub. Bununla əlaqədar olaraq, Milli Bank prudensial normaları sərtləşdirməyə məcbur olub", - Orucov vurğulayıb.
Hazırda ölkənin bank sektorunun artım dinamikası sabitləşib və Milli Bank ölkə banklarını kredit məhsullarının keyfiyyətini qiymətləndirməyə və daha mühafizəkar siyasət aparmağa çağırıb. Nəticədə, sentyabr-oktyabr ərzində kredit yatırımları yeddi faiz, mal və xidmətlərin kreditləşdirilməsi doqquz faiz artıb. Buna baxmayaraq, yalnız oktyabrda banklar tərəfindən 450 - 500 mln. manat yeni kredit verilib.
Dekabrın 10-na olan mübadilə məzənnəsi - 0,8072 AZN/USD
Müəlliflə əlaqə saxlamaq üçün elektron ünvan: [email protected]