Azərbaycan, Bakı, 19 dekabr/ Trend , müxbir Ü.İsmayılova/ "Beynəlxalq Maliyyə Korporasiyası (BMK) Azərbaycanın korporativ idarəetmə layihəsinin ikinci fazası çərçivəsində sınaq təşkilatların seçimini 2009 - cu ilin fevralında başa çatdırmağa hazırlaşır", - layihənin rəhbəri Kerolayn Brayt cümə günü bildirib.
"Biz, bank olmayan təşkilatları və ən azı bir sığorta şirkətini layihənin ikinci fazasında iştiraka cəlb etmək niyyətindəyik", - Brayt deyib.
Onun sözlərinə görə, hazırda bir mikromaliyyələşdirmə təşkilatı ilə danışıqlar aparılır. Bununla belə, layihənin rəhbəri həmin şirkətin adını açıqlamayıb.
BMK-nın Azərbaycanın Korporativ İdarəetmə Layihəsinin ikinci fazası İsveçrənin İqtisadi Əlaqələr üzrə Dövlət Katibliyi Seco-nun maliyyə dəstəyi ilə iyunda başlayıb.
Layihənin ikinci fazası çərçivəsində aşağıdakı əsas istiqamətlər üzrə iş aparılır: şirkətlərə yardım, qanunvericilikdə islahatlar, təhsil mərkəzləri ilə iş, maliyyə sektoru ilə iş, sərmayədarlarla iş.
Müəlliflə əlaqə saxlamaq üçün elektron ünvan:[email protected]
