Azərbaycanda qiymət fəaliyyətinin sertifikatlaşdırılmasına start verilib
Azərbaycan, Bakı, 10 mart / Trend , müxbir Ü.İsmayılova /
Azərbaycanda ilk dəfə olaraq qiymətləndiricilərin sertifikatlaşdırılması keçirilir. Bu barədə çərşənbə axşamı Azərbaycan Qiymətləndiricilər Cəmiyyətinin fəxri sədri, millət vəkili Xanhüseyn Kazımlı məlumat verib.
"Martın 9-10-da seminarlar keçiriləcək, martın 10-11-də qiymətləndiricilərin sonrakı sertifikatlaşdırılması məqsədi ilə attestasiya keçiriləcək", - deyə Kazımlı bildirib.
Onun sözlərinə görə, imtahanda iştirak etmək üçün 10 nəfər müraciət edib. Bundan savayı imtahanlarda yerli ekspertlərlə yanaşı, beynəlxalq ekspertlər və qiymət şirkətinin nümayəndələri də iştirak edəcək
Respublikada qiymətləndiricilərin sertifikatlaşdırılması Beynəlxalq Maliyyə Korporasiyasının təşəbbüsü ilə Azərbaycanda və Mərkəzi Asiyada ipotekanın ilkin inkişafı layihəsi çərçivəsində həyata keçirilir.
Azərbaycanda qiymət fəaliyyəti 1995-ci ildə qəbul edilmiş "Qiymət fəaliyyəti" haqqında qanun ilə nizamlanır.
Azərbaycan Qiymətləndiricilər Cəmiyyəti 1997-ci ildə qeydiyyatdan keçib. Onun üzvləri sırasına 80 fiziki, 7 hüquqi şəxs daxildir.
Məqalə müəllifi ilə əlaqə ünvanı: [email protected]
