Azərbaycan, Lənkəran, 02 iyul / Trend , müxbir P.Əliyeva /
Azərbaycanın Lənkəran rayonunda ünvanlı sosial yardımın verilməsi üzrə proqramın həyata keçirilməsinin üç ili ərzində 8 635 ailə 8,727 milyon manat yardım alıb. Bu barədə çərşənbə günü rayonun Əmək və Əhalinin Soasil Müdafiəsi Mərkəzinin başçısı Sərraf Heydərov bildirib.
Onun sözlərinə əsasən, üç il ərzində ünvanlı sosial yardım (ÜSY) alan şəxslərin sayı 44923 nəfər təşkil edib. ÜSY alan ailələrdən 20-si şəhid, 22-si isə məcburi köçkünlərin ailələridir.
Üç il ərzində Lənkəran rayonunun Əmək və Əhalinin Soasil Müdafiəsi Mərkəzinə ÜSY almaq üçün 10653 ailə müraciət edib, həmin ailələrdən 2018 ailəyə gəlirləri barədə yanlış məlumat verdikləri üçün yardımın verilməsindən imtina edilib.
"2006-cı ildə Lənkəran rayonunda ÜSY alan ailələrin sayı 1798, 2007-ci ildə 2427, 2008-ci ildə isə 4410 ailə təşkil edib", - deyə Heydərov bildirib.
Azərbaycanda ÜSY 2006-cı ilin iyul ayının 1-dən verilir. Ölkədə 2009-cu ilin iyulun 1-nə kimi ÜSY alan ailələrin sayı 179,5 min ailə (817,35 min nəfər) təşkil edir. Ölkədə bir ailə üçün ÜSY-nin orta aylıq məbləği 98,19 manat, bir nəfərə isə 21,56 manat təşkil edir. ÜSY alanların 77,8 faizi ilk dəfə yardım alır.
İyulun 1-nə olan rəsmi məzənnə 0,8042 AZN/USD təşkil edir.
Məqalə müəllifi ilə əlaqə ünvanı: [email protected]
