Azərbaycan, Bakı, 23 iyul / Trend , müxbir N.İsmayılova /
Azərbaycan bankı Royal Bank iyunun 11-dən Mərkəzi Bank yanında fəaliyyət göstərən Azərbaycan İpoteka Fondunun (AİF) vəsaiti hesabına 8 ipoteka krediti verib. Bu barədə bankdan məlumat verilib.
"Bank kreditləşməyə iyunda başlayıb və bu günə qədər artıq 437 min manat məbləğində 8 ipoteka krediti verib", - bankdan deyilib.
Bankdan bildirilib ki, hazırda bank daha 26 ərizə nəzərdən keçirilir və tezliklə daha 4 ipoteka kreditinin verilməsi gözlənilir.
AİF-in xətti ilə bankın ipoteka portfeli bir milyon manat təşkil edir. Bu məbləğdən bank 500 min manatı alıb ki, onun da böyük hissəsi artıq paylanılıb. Gələn həftə bank AİF-ə qalan vəsaitin verilməsi ilə bağlı müraciət etmək niyyətindədir.
Bank xüsusi ipoteka proqramını da davam etdirir.
İpoteka kreditlərinin verilməsinə başlanması ilə əlaqədar olaraq 17 bank, 7 qiymətləndirmə şirkəti və 10 sığorta şirkəti AİF-in səlahiyyətlisi təyin edilib.
İpoteka kreditləşməsinin şərtləri bunlardır: kreditlər milli valyuta - manatla və yalnız Azərbaycan vətəndaşlarına verilir; ipotekanın obyekti yalnız mənzil və şəxsi ev ola bilər; ipoteka kreditləşməsinin məbləği bazar qiymətlərinin 85 faizini keçməməlidir; kredit üzrə aylıq ödəmə borc götürənin aylıq gəlirinin 70 faizini keçməməlidir; həyat və s. sığortalar üzrə müqavilə olmalıdır.
Güzəştli şərtlərlə kredit şəhid ailələrinin üzvlərinə, milli qəhrəmanların ailə üzvlərinə, məcburi köçkünlərə, 3 ildən çox stajı olan dövlət qulluqçularına, elmləri namizədi və doktorluq dərəcəsi olanlara, idman sahəsində xidməti olan şəxslərə, eləcə də minimum xidmət müddəti üç il olan hərbçilərə verilir.
Hər ailənin bir dəfə güzəştli ipoteka krediti almaq hüququ var.
2005-2008-ci illərdə AİF vasitəsilə ipotekanın maliyyələşdirilməsi üçün Azərbaycanın dövlət büdcəsindən 94 milyon manatın ayrılması nəzərdə tutulub. Banklar vasitəsilə bunun 70 milyon manatdan çoxu verilib.
2009-cu ildə sosial ipotekanın maliyyələşdirilməsi üçün dövlət büdcəsindən 14 milyon manat ayrılıb.
İyulun 23-nə olan rəsmi məzənnə 0,8041 AZN/USD təşkil edir.
Məqalə müəllifi ilə əlaqə ünvanı: [email protected]