Azərbaycan, Bakı, 19 avqust / Trend , müxbir H. Vəliyev /
Yanvar-iyul aylarında Azərbaycan Vergilər Nazirliyinə (VN) kompüter terminalları vasitəsilə 22169 vergiödəyicisi müraciət edib, onlara 57331 ximdət göstərilib. Bu barədə çərşənbə günü nazirlikdən məlumat verilib.
Nazirliyin məlumatına görə, 2008-ci ilin aprel-dekabr aylarında VN-nin kompüter terminallarından 19874 vergiödəyicisi istifadə edib və onlara göstərilən xidmətin miqdarı isə 48125 olub. Kompüter terminallarının yaradılmasında əsas məqsəd ölkənin regionlarında çalışan vergiödəyicilərinə müasir standardlara uyğun vergi xidməti göstərməkdir. Terminallar vasitəsilə vergi bəyanatları, düzgün tərtibi aydınlaşdırmaq və bəyanatları və digər sənədləri təqdim etmək üzrə, vergiödəyicilərinin şəxsi vərəqələrindəki məlumatlara baxmaq, vergi qanunvericiliyinə dair informasiya vermək və onu tətbiq etmək, vergiödəyicilərinin vergi orqanlarında qeydiyyatı və "vahid pəncərə" vasitəsilə sahibkarlıq subyektlərinin qeydiyyatı və s. üzrə xidmət göstərilə bilər.
Hazırda 14 aprel 2009-cu ildə təsdiq olunmuş 2009-2013-cü illərdə regionların sosial-iqtisadi inkişafı üzrə dövlət proqramına əsasən, VN regionlar üzrə kompüter terminallarının sayının artırılması üzrə iş aparır. Göstərilən dövr ərzində respublikanın bütün regionlarında terminallar quraşdırılması planlaşdırılır. Hazırda 15 terminal quraşdırılıb. Bunlar Xırdalan, Sabirabad, Cəlilabad, Masallı, Balakən, Ağdaş, Şəki, Xaçmaz, Ağsu, İmişli, İsmayıllı, Salyan, Qazax, Mingəçevir və Goranboydadır. VN-nin planına əsasən, 2009-cu ildə 20 terminal quraşdırılacaq.
Mütəxəssislərin fikrincə, müvafiq proqram təminatının mövcudluğu ilə vergilərin qəbulu üzrə ödəmə terminallarının funksiyalarını bankomatlar da yerinə yetirə bilər.
Məqalə müəllifi ilə əlaqə ünvanı: [email protected]
