Azərbaycan, Bakı, 26 avqust / Trend , müxbir İ.Xəlilova /
Ukraynanın bank bazarının qeyri-sabit vəziyyəti "Zamin Bank" səhmdar kommersiya bankının ora daxilolma planlarına təsir edib. Bu barədə çərşənbə günü bankın İdarə Heyətinin sədri Zəhra Quliyeva deyib.
"Ukrayna banklarının maliyyə vəziyyətinə mənfi təsir göstərən dünya böhranın təsiri ilə Ukraynanın Milli Bankı xarici bankların filial və nümayəndəliklərinin açılmasına müvəqqəti moratorium tətbiq edib, - Quliyeva deyib. - Biz öz tərəfimizdən Ukrayna bazarına girməyə hazırıq, lakin şərtlərin sərtləşdirilməsinə görə bazarda vəziyyətin yaxşılaşmasını gözləməyə məcburuq".
Ukrayna bankları 2008-2009-cu ildəki zərərə görə yığılmış borclarının ödəmələrində çətinlik hiss edirlər. Bununla əlaqədar olaraq, Milli Bank istiqrazlar üzrə vaxtından əvvəl məcburi ödəmələrə qadağa qoyub. Qadağa maliyyə təşkilatlarının kütləvi defoltuna yol verməmək məqsədi ilə tətbiq edilib. Ukraynada zərər görmüş təsisatların sayı 2009-cu ilin ikinci rübünün yekunlarına görə 64-ə çatıb.
Zamin Bank Ukraynada nümayəndəliyini 2009-cu ilin mayınadək açmağı planlaşdırırdı. Kiyevdə bu, Zamin Bankın ikinci nümayəndəliyi olmalı idi. Bankın ilk daimi nümayəndəliyi Moskvada 2007-ci ildə açılıb.
Bankın 2008-2012-ci illərdə strateji inkişafı üzrə gələcəkdə Ukraynanın bank bazarında törəmə bankın yaradılması planlaşdılır. Bu da 2009-cu ildən sonraya planlaşdırılıb. Zamin Bank Ukraynada artıq fəaliyyətdə olan bank almaq yox, yeni bank yaratmaq niyyətindədir. Birinci mərhələdə Rusiyada, ikinci mərhələdə isə Ukraynada bankın əsas fəaliyyət sahəsi pul köçürmələri xidməti olacaq. Bu, banisi kimi Zamin Bankın çıxış etdiyi Caspian Money Transfer beynəlxalq sistemi vasitəsilə mümkündür. Bu ölkələrdə gələcəkdə bank əməliyyatlarının həyata keçirilməsi də istisna edilmir.
"Hazırda hələki digər ölkələrin maliyyə bazarına girməyi planlaşdırmırıq. Əsas diqqəti ölkə daxilində filialların inkişafına yönəltmişik", - bank rəhbəri deyib.
Quliyevanın sözlərinə görə, bu gün artıq 35 filial və 14 şöbə (valyuta mübadiləsi şöbələrindən başqa) açılıb. Filiallardan 20-si Bakıda yerləşir.
Zamin Bank Azərbaycan Beynəlxalq Bankı (xaricdə ən geniş şəbəkəyə malik) və Qafqaz İnkişaf Bankından sonra ölkədən kənarda təmsil olunan üçüncü bankdır. ABB və Qafqaz İnkişaf Bankı Gürcüstanda təmsil olunurlar. Zamin Bank da gələcəkdə bu ölkədə nümayəndəliyini açmaq niyyətindədir. Hələlik bank Gürcüstan bankları ilə müxbir hesabı vasitəsilə işləyir.
Məqalə müəllifi ilə əlaqə ünvanı: [email protected]