Azərbaycan, Bakı, 02 sentyabr / Trend , müxbir Ü.İsmayılova /
İngiltərə-Azərbaycan birgə sığorta şirkəti Thames Sığorta Qrupu 2009-cu ilin yekunları üzrə yığımların 10-12 faiz azalmasını proqnozlaşdırır. Bu barədə çərşənbə günü şirkətin İdarə Heyətinin sədri Samir Mustafayev bildirib.
"İlin yekunları üzrə yığımların həcminin azalması sığorta bazarında yaranan durğunluqla əlaqədar proqnozlaşdırılır", - Mustafayev bildirib.
Onun sözlərinə görə, hazırda şirkət tibbi sığorta və yüklərin sığortası üzrə sövdələşmənin bağlanması üçün iki böyük müştəri ilə danışıqlar aparır.
Mustafayevin sözlərinə əsasən, tibbi sığorta üzrə sövdələşmə artıq imzalanıb, yüklərin sığortası üzrə sövdələşməyə dair danışıqlar davam edir.
"Əgər ikinci sövdələşmə də imzalanarsa, bu iki müqavilənin olması ilə biz haqların ötən ildəki səviyyədə saxlanılması və hətta onu ötməsini planlaşdırırıq, - Mustafayev bildirib. - Bununla əlaqədar olaraq şirkət nizamnamə kapitalının elan olunan səviyyəyə çatdırılması üçün bütün mümkün xərcləri azaldır", - o əlavə edib.
Onun sözlərinə görə, ilin sonunadək şirkətin kapitalının hazırda olan 900 min manatdan bir milyon manata kimi çatdırılması planlaşdırılır.
Thames Sigorta Qrupunun 2008-ci ildə fəaliyyət yekunlarına əsasən, şirkətin haqları 1,59 milyon manat, ödəmələri 0,29 milyon manat təşkil edib. Yanvar-iyun ayında şirkətin haqları 0,46 milyon manat, ödəmələri 0,06 milyon manat təşkil edib.
İngiltərə-Azərbaycan birgə sığorta şirkəti "Thames Sığorta Qrupu QSC-nin" Britaniya təsisçisi, nizamnamə kapitalında pay hissəsinin 49 faizinə malik olan Glencarron Group Limited şirkəti Azərbaycanın sığorta bazarında 1996-cı ildən fəaliyyət göstərir. Qalan pay hissəsi (51 faiz) Azərbaycanın yerli fiziki və hüquqi şəxsinə (Gala İnvestment) məxsusdur.
Sentyabrın 02-nə olan rəsmi məzənnə 0,804 AZN/USD təşkil edir.
Məqalə müəllifi ilə əlaqə ünvanı: [email protected]
