Azərbaycan, Bakı, 26 oktyabr / Trend , müxbir Ü.İsmayılova/
Beynəlxalq Maliyyə Korporasiyasının (BMK) ekspertləri "Rieltor fəaliyyəti haqqında" qanun layihəsi ilə bağlı ilkin tövsiyələr hazırlayıblar, sözügedən tövsiyələr Bakı Rieltorlar Assosiasiyasına (BRA) cümə günü təqdim ediləcək. Bu barədə bazar ertəsi BMK-nın Bakı nümayəndəliyindən məlumat verilib.
"Qanun layihəsinin ilkin qiymətləndirilməsinə əsasən bir sıra əskikliklər aşkar olunub", - BMK-dan bildirilib.
Mənbədən deyilənə görə, qanun layihəsində peşəkar rieltor fəaliyyətinin rieltor təhsilinin olması, sertifikasiya, lisenziya və s. kimi əsas aspektləri nəzərdə tutulub.
BRA-nın təsisçiləri "MBA Group" şirkəti, "New Europe" və "Baki Emlak" rieltor şirkətləridir. 2008-ci ilin oktyabrında assosiasiya Azərbaycan Ədliyyə Nazirliyində qeydiyyatdan keçib. Assosiasiyanın 53 üzvü var, onlardan 13-ü hüquqi, 40-ı fiziki şəxsdir. Hüquqi şəxslər üçün üzvlük haqqı 300 manat, fiziki şəxslər üçün isə 100 manat təşkil edir.
Assosiasiyanın əsas məqsədləri Azərbaycanda rieltor fəaliyyəti standartlarının müəyyənləşdirilməsi, xüsusi peşəkar hazırlıq mərkəzinin yaradılması, həmçinin rieltorların sertifikasiya sisteminin tətbiqidir.
Məqalə müəllifi ilə əlaqə ünvanı: [email protected]