Azərbaycan, Bakı, 08 fevral / Trend , müxbir Ü.İsmayılova/
Azərbaycanda fiziki şəxslər üçün avtomobil sığortasının vahid qaydalarının tətbiqi üzrə normativ aktlar təsdiq edilib. Bu barədə bazar ertəsi Maliyyə Nazirliyinin Dövlət Sığorta Nəzarəti Xidməti rəhbərinin müavini Mahir Abdullayev bildirib.
"Hazırda bu sənədlər hazırlıq mərhələsindədir", - Abdullayev deyib.
Onun sözlərinə görə, yaxın günlərdə Azərbaycan Sığortaçılar Assosiasiyasının ümumi yığıncağında DSNX tərəfindən təsdiq edilən vahid qaydalar təqdim ediləcək.
Abdullayev deyib ki, bundan sonra bu sənədlər normativ sənəd qismində təsdiqlənməsi üçün Azərbaycanın Ədliyyə Nazirliyinə təqdim ediləcək.
"Düşünürəm ki, Azərbaycanda ikinci rübdən etibarən avtomobil sığortasının vahid qaydaları tətbiq ediləcək", - Abdullayev deyib.
Sığortaçılar Assosiasiyasının icraçı direktoru Qafar Məcidov bir müddət əvvəl demişdi ki, ölkənin sığorta bazarında mədəni rəqabətin təmin edilməsi məqsədi ilə ümumi qanun tətbiq olunacaq. Onun sözlərinə görə, hazırda sığortaçılar müştərilərə müxtəlif xidmətlər təklif edirlər ki, bu da bazarın ümumi inkişafına mane olur.
"Bundan sonra sığortaçılar yeni qanunun tətbiqi ilə yalnız tarif və ödəmələrin həcmi üzrə rəqabət apara biləcəklər", - Məcidov deyib.
Azərbaycanda 28 sığorta və bir təkrar sığorta şirkəti fəaliyyət göstərir. 2009-cu ilin fəaliyyət yekunu üzrə şirkətin haqları 163,31 milyon manat, ödəmələri isə 53,07 milyon manat təşkil edib. Ötən il sığortaçıların avtomobil sığortası üzrə haqlarının həcmi 16,25 min manatlıq ödəmələrlə 31,26 min manat təşkil edib.
