Azərbaycan, Bakı, 18 fevral / Trend , müxbir N.İsmayılova/
Fevralın 1-nə olan məlumata görə TuranBankın aktivlərinin həcmi, ilin əvvəli ilə müqayisədə 2,6 faiz, 2009-cu ilin analoji dövrü ilə müqayisədə isə 37,4 faiz artaraq 112,8 milyon manat təşkil edib. Bu barədə bankın məlumatında deyilib.
Bankın kredit portfeli cari ilin əvvəli ilə müqayisədə 2,4 faiz, ötən ilin yanvarı ilə müqayisədə isə 19,6 faiz artaraq fevralın birinə 79,8 milyon manat təşkil edib. Bankın gəlirləri il ərzində 14,7 faiz artaraq 1,2 milyon manat təşkil edib. Hesabat dövrü ərzində Bankın balans mənfəəti 0,4 milyon manat təşkil edib ki, bu da 2009-cu ilin analoji dövrü ilə müqayisədə 63,7 faiz artım deməkdir.
Cari ilin yanvar ayı üzrə Bankın depozit portfeli ilin əvvəli ilə müqayisədə 10,8 faiz, 2009-cu maliyyə ilinin nəticələri ilə müqayisədə isə 38,9 faiz artaraq 39,9 milyon manat təşkil etdib.
Bankın məcmu kapitalı ilin əvvəli ilə müqayisədə 2 faiz, 2009-cu ilin analoji dövrü ilə müqayisədə isə 7,9 faiz artaraq 1 fevral tarixinə 20,8 milyon manat, nizamnamə kapitalı isə 17 milyon manat təşkil edib.
Bank həmçinin Rusiya, MDB ölkələri və digər xarici ölkələrə ABŞ dolları, Rus rublu və Avro ilə pul köçürmələrini həyata keçirməyə imkan verən "Zolotaya Karona" təcili pul köçürmə sistemini reallaşdırmaq üzrə də işlər aparır.
Bankın nizamnamə kapitalı strukturu ümumilikdə 25 səhmdar olmaqla - 5 hüquqi (21.8 faiz) və 20 fiziki şəxsdən (78.2 faiz) ibarətdir.
Hazırda Bankın 11 filial və 21 valyuta mübadilə şöbəsi fəaliyyət göstərir.
Fevralın 18-nə olan rəsmi məzənnə 0,8034 AZN/USD təşkil edir.
