Azərbaycan, Bakı, 16 mart / Trend , müxbir N.İsmayılova/
Avropa Yenidənqurma və İnkişaf Bankı (AYİB) 2010-13-cü illərdə Azərbaycanla bağlı strateji plan hazırlayır. Bu barədə çərşənbə axşamı Bakıda səfərdə olan AYİB prezidenti Tomas Mirou bildirib.
"AYİB-in gələcək strategiyasının əsas məqsədi infrastruktur layihələrinə, maliyyə institutlarına və özəl sahibkarlığa investisiya qoyuluşu yolu ilə Azərbaycanın qeyri-neft sektorunun inkişafını dəstəkləməkdir", - AYİB rəhbəri deyib.
Onun sözlərinə görə, bankın strategiyasının ilkin versiyası Azərbaycan hökuməti tərəfindən AYİB ilə əməkdaşlıq üçün yeni sahələrə dair təkliflərin qəbulunu nəzərdə tutur.
"Təkliflər (hökumətin) təsdiqlənmək üçün AYİB Direktorlar Şurasına təqdim olunacaq sənədin yekun versiyasına daxil ediləcək", - Mirov deyib.
AYİB Azərbaycanda ümumi məbləği 1,4 milyard dollar həcmində 103 layihəni maliyyələşdirib. AYİB ilə əməkdaşlıq edən maliyyə institutları bankdan 69 kredit xətti və ümumi məbləği 223 milyon dollar həcmində kapital qoyuluşu alıblar.