Azərbaycan, Bakı, 3 avqust /Trend, müxbir İ.Xəlilova/
Azərbaycanın sığorta şirkəti "Alfa Sığorta" ASC 2016-cı ilə hesablanan yeni fəaliyyət strategiyasını təsdiq edib. Bu barədə "Alfa Sığorta SC-nin Direktorlar Şurasının sədri Xəyal Məmmədxanlı bildirib.
"Yeni strategiya daha ambisiyalıdır və qısamüddətli, ortamüddətli və uzunmüddətli inkişaf perspektivlərini nəzərdə tutan real məqsədləri güdür. Qısamüddətli dövr 2010-11-ci illəri, ortamüddətli 2012-13-cü illəri, üzunmüddətli isə 2015-ci ili əhatə edir", - Məmmədxanlı qeyd edib.
Strategiyanın həyata keçirilməsi nəticəsində "Alfa Sığorta" ölkənin sığorta bazarında şirkətlərin ilk onluğuna daxil olmaq və bazar payını 10 faizə çatdırmaq niyyətindədir. 2010-cu ilin birinci yarısının yekunlarına görə, şirkət ölkədə fəaliyyət göstərən 28 sığorta şirkəti arasında 16-cı yeri tutub.
2016-cı ilədək şirkətin sığorta haqlarının həcminin 10-15 milyon manata çatdırılması planlaşdırılıb.
"Düşünmürəm ki, ölkənin sığorta bazarı iki-üç dəfə artacaq. O, "İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında" yeni qanunun tətbiq ediləcəyi, eləcə də icbari sığorta növlərinin effektivliyinin artırılması halında 5-10 faiz arta bilər. Hər bir halda, bazarın həcmi yaxın iki ildə çətin ki 200 milyon manatı ötsün", - Məmmədxanlı qeyd edib.
İyunun sonuna şirkət 1 156,389 min manat məbləğində sığorta haqqı yığıb, ödənişlər isə 97,65 min manat təşkil edib. Altı ay ərzində şirkət 10 351 sığorta müqaviləsi bağlayıb.
"Alfa Sığorta" hazırda 30 növ, o cümlədən altı icbari və 24 könüllü sığorta xidmətinin göstərilməsinə görə lisenziyaya malikdir. Onlardan daha fəal istifadə olunanı mülkiyyət, avtonəqliyyat vasitələri, bədbəxt hadisələr, kənd təsərrüfatı riskləri, yük və tibbi sığortalardır.
"Alfa Sığorta" ASC-nin təsisçisi 2006-cı ilin dekabrında şirkətin səhmlərinin 100 faizinə sahib çıxan yerli "Texnikabank" ASC-dir.
İlin birinci yarısının yekunlarına görə, şirkətin aktivləri 5 093,07 min manat səviyyəsində formalaşıb. Şirkətin nizamnamə kapitalı 3,1 milyon manat təşkil edir. Altı ayın yekunları üzrə şirkətin balanslı gəliri 484 min manat olub.
Avqustun 3-nə olan rəsmi məzənnə 0,8034 AZN/USD təşkil edir.
