Qazaxıstanda son beş il ərzində yeni mənzillərin bir kvadratmetrinin qiyməti təxminən 50 faiz artıb
Azərbaycan, Bakı, 8 sentyabr /Trend, müxbir S.Süleymanov/
Cari ilin avqust ayında Qazaxıstanın mənzil bazarında qiymət artımı müşahidə olunub. Bu barədə Qazaxıstan Respublikasının Statistika Agentliyinin mətbuat xidməti xəbər verir.
Belə ki, məlumata görə, bundan əvvəlki ayla müqayisədə 2010-cu ilin avqustunda təmirsiz mənzillərin qiyməti 0,5 faiz, təmirli mənzillərin alınıb satılması üzrə qiymətlər 0,4 faiz, yeni mənzillərin satışı üzrə - 0,3 faiz, təmirli mənzillərin icarəsi üzrə - 0,2 faiz artıb.
Son ay ərzində mənzillərin qiymət artımı yüksək deyil. Lakin 2005-ci ilin dekabr ayı ilə müqayisədə yeni mənzillərin qiymətində artım 49,4 faiz, təmirli mənzillərin alınıb satılması üzrə - 69,4 faiz, təmirsiz mənzillərin satışı üzrə - 117 faiz təşkil edib.
Statistika Agentliyinin məlumatına görə, hazırda yeni mənzillərin bir kvadratmetri 139 min təngə (təxminən 950 dollar), yeni mənzilin bir kvadratmetrinin alınıb satılması 102 min təngə (700 dollar), təmirsiz mənzillərin alınıb satılması üzrə qiymətlər isə 60 min təngədir (400 dollar) .
