Azərbaycan, Bakı, 13 sentyabr /Trend, müxbir A.Axundov/
Bakının daşınmaz əmlak bazarında daha çox tələbat 50 min manatadək olan [ilkin və ya təkrar bazar olmasından asılı olmayaraq] yaşayış mənzillərinədir. Bu barədə bazar ertəsi Bakı Rieltorlar Assosiasiyasının rəhbəri Elnur Azadov deyib.
Onun sözlərinə görə, Azərbaycan əhalisinin yaşayış mənzillərinə böyük ehtiyacı fonunda tikilən mənzillərin sayı o qədər də yüksək deyil.
"1970-ci ildən 1990-cı ilədək indiki Bakının 30 faizi tikilib, SSRİ dağıldıqdan sonra isə cəmi 500 yenitikili inşa edilib. Bu göstərici çox aşağıdır", - Azadov qeyd edib.
Azadovun sözlərinə görə, istənilən tikinti şirkəti binanı istismara verən zaman bir dənə də olsun boş mənzili qalmır.
"Bakıda tikintisi başa çatan və ya başa çatmaq mərhələsində olan 100 yenitikili üzrə təhlil aparsaq, görərik ki, bircə boş mənzil qalır, yəni tələbat kifayət qədər yüksəkdir. Çoxları öz köhnə mülkiyyətlərini sataraq, yenitikililərdə mənzil almaqda maraqlıdırlar. Təəssüf ki, indi bizim yenitikililərimiz azdır", - Azadov vurğulayıb.
Onun sözlərinə görə, tikini şirkətlərinin daha çox tikməsi üçün şərait yaratmaq lazımdır.
"Bazarda daşınmaz əmlak nə qədər geniş olsa, bu sahədə bir o qədər qiymətin sabitləşməsini və azalmasını tez gözləmək olar", - Azadov bildirib.
Azadovun sözlərinə görə, tikintinin aşağı tempi şəhər mərkəzində tikintinin aparılmasına icazənin verilməsinin sayının azalması ilə izah olunur.
"Şəhərin daxili hissəsində, mərkəzdə tikintinin aparılmasına icazənin verilməsinin azalma halları müşahidə edilməkdədir. Merliyin son on ildəki statistikasını götürsək, görərik ki, daha çox icazə 2004-cü ildən 2007-ci ilədək verilib. 2007-ci ildən sonra tikintinin aparılmasına icazə, demək olar, dayandırılıb, vətəndaşların əksəriyyəti şəhər kənarında daşınmaz əmlak almaqda maraqlı deyil", - Azadov söyləyib.
Azadovun sözlərinə görə, tikintinin aparılmasına icazələrin çoxu şəhər ətrafında - Abşeron, Yasamal, Əhmədlidə verilib. "Halbuki heç də hamı bu rayonlarda daşınmaz əmlak almaqda maraqlı deyillər", - Azadov vurğulayıb.
İyulda Bakının daşınmaz əmlak bazarında bir kvadratmetr üçün orta qiymət 866 manat təşkil edib ki, bu da iyun ayının göstəricisindən dörd manat (0,4 faiz) aşağıdır. İyulda qiymətlərin ikinci rüblə müqayisədə azalması 1,6 faiz, 2010-cu ilin əvvəlindən 3,5 faiz, ötən ilin analoji dövründə 8,6 faiz səviyyəsində olub.
İyulda Bakının təkrar mənzi bazarında sövdələşmələrin 2,5 faiz azalma dinamikası müşahidə olunub. Bakının mənzil bazarında yenitikililərin payı artmaqda davam edərək, iyulda 60,9 faiz təşkil edib. Təkrar mənzil bazarında yenitikililərin payının iyuna nisbətdə 0,2 faiz artımı müşahidə olunub.
2008-ci ilin oktyabrında Bakı Rieltorlar Assosiasiyası Azərbaycanın Ədliyyə Nazirliyində qeydiyyatdan keçib. Hüquqi şəxslər üçün üzvlük haqqı 300, fiziki şəxslər üçün 150 manat təşkil edib.
Assosiasiyanın əsas vəzifələri - Azərbaycanda rieltor fəaliyyətinin standartlarının müəyyənləşdirilməsi, xüsusi peşəkar hazırlıqı mərkəzin yaradılması, eləcə də rieltorların sertifikatlaşdırılması sisteminin tətbiqindən ibarətdir.
