Azərbaycan, Bakı, 9 dekabr /Trend, müxbir İ.Xəlilova/
Yaxın 3-5 il ərzində Azərbaycan bankı "Bank of Baku" riteyl xidmətlər seqmentində göstərilən xidmətlərinin keyfiyyətinin artırılması və innovasiyalar üzərində daimi iş hesabına lider mövqeyini qoruyub saxlamaq fikrindədir. Bu barədə Trend-ə cümə axşamı "Bank of Baku"nun idarə heyətinin sədri Cəlal Qasımov bildirib.
"Büzüm üçün dünya maliyyə böhranı şəraitində nisbətən daha çox davamlılıq nümayiş etdirən riteyl əsas biznes olaraq qalacaq", - Qasımov deyib.
Onun sözlərinə görə, əgər böhrana qədər bank orta hesabla 10-12 milyon manat həcmində məhsul satırdısa, bu gün satışın həcmi ayda 18 milyon manat təşkil edir. Halbuki böhranın ən qızğın dövründə (2008-ci ilin noyabrından 2009-cu ilin fevralınadək) satış həcmləri demək olar ki, iki dəfə düşmüşdü.
"Azalma bank tərəfindən müştəri seçimi meyarlarının sərtləşdirilməsi, eləcə də kreditləşdirdiyimiz məhsulların (mobil telefonlar, ev əşyaları, məişət texnikası) əksəriyyətinə tələbin aşağı düşməsi ilə bağlı idi. Yaranmış vəziyyətin fonunda ötən ilin fevral-mart aylarınadək biz yeni məhsullar - Cash-kreditlər, Express-kartlar və s. tətbiq etməyi bacardıq. Və bu yeni məhsulların hesabına bank böhranı kifayət qədər yaxşı dəf etdi", - Qasımov bildirib.
Bankın idarə heyətinin sədri hesab edir ki, bu gün bank artıq kreditlərin verilməsi üzrə rekord həcmlərə malikdir və 2008-ci ilin ən yaxşı dövründə olduğundan 30 faiz çox məhsul satır.
Hazırda kreditlərin 40 faizi Cash-in vasitəsilə ödənilir və bank bu göstəricini gələn ilin ortalarınadək 75 faizədək artırmağı planlaşdırır. Bunun bu gün yalnız bankların filiallarında yerləşən ödəniş aparatlarının miqdarının artırılması hesabına təmin olunması nəzərdə tutulub. Belə ki, bank onları öz tərəfdaşlarının satış nöqtələrində də quraşdırmağı planlaşdırıb.
Bank ayda 45 min müştəriyə ödəniş köşkləri vasitəsilə ödəmə həyata keçirir. "Əgər biz onları ilyarım bundan əvvəl tətbiq etməsəydik, bu gün biz bütün müştəri axınına xidmət göstərmək üçün daha üç filiala malik olmalı idik", - Qasımov bildirib.
Satış portfelinin artması ilə yanaşı, məhsullar xəttində də 10-13 vahidədək genişlənmə müşahidə olunub. Əgər böhrana qədər avtomobil kreditlərinin xüsusi çəkisi satışın ümumi həcminin 50-60 faizini təşkil edirdisə, bu gün o, 35-40 faizədək düşüb.
"Gələcəkdə avtomobil kreditlərinin payının daha da azalacağı gözlənilir. Belə vəziyyət digər məhsulların satış payında ciddi artımla əlaqədar müşahidə olunur", - Qasımov qeyd edib.
Daha sabit satış kredit kartları ilə müşahidə olunur. Onların həcmi əvvəlki kimi 5-10 faiz səviyyəsində qalır. Digər məhsulların payı (mobil telefonlar, məişət texnikası) bu gün 2008-ci ildəki 40 faizə qarşı 20-25 faiz, Cash-kreditlər 30-40 faiz [2009-cu ilin fevral-martında tətbiq olunub] təşkil edir. Bununla yanaşı, mobil telefonların alınması üzrə kreditlərə görə risklər kompüterlərin alınması üzrə olduğundan çoxdur.
2010-cu ilin 9 ayı ərzində "Bank of Baku" yeni məhsulların tətbiqi nəticəsində 12,1 milyon manat səviyyəsində mənfəət əldə edib. Halbuki, 2008-ci il ərzində bu göstərici 8 milyon manat səviyyəsində olub.
Qasımov bankın ümumi kredit portfelində riteylin payının artdığını da qeyd edib. Əgər 2007-2008-ci illərdə bank kiçik və orta biznes sahəsində iri müştərilərə malik idisə, bu gün onların payı riteylin xeyrinə azalıb. Bu ondan xəbər verir ki, bank bu gün riteyl sayəsində 2007-2008-ci illərdəkindən çox qazanır. Bankın ümumi gəlirlərində təqribən 70-75 faiz riteylin, yerdə qalanlar isə mikro, kiçik və orta biznesin maliyyələşdirilməsi hesabına təmin olunub. 2008-ci ildə gəlirlərdə riteylin payı 60-65 faiz təşkil edib.
Depozit portfeli üzrə "Bank of Baku"nun bazar payı 4 faizə yaxın təşkil edir, halbuki əvvəllər 3,5 faiz səviyyəsində idi. Bank kart biznesinin inkişafına əvvəllər az diqqət yetirirdi, lakin gələn ildən bu sahədə ciddi dəyişiklik gözlənilir. "Bank of Baku" istehlak kreditləri ilə bağlı ölkənin bank bazarında öz payını xeyli artırıb və bu gün ən azı 75-80 faiz təşkil edir.
Oktyabrda bankın aktivləri 3,1 faiz artaraq 236,114 milyon manat təşkil edib. Bankın depozit portfeli hesabat dövründə 3,8 faiz artaraq 181,79 milyon manat olub. Bunun 124,33 milyon manatı girov və fiziki şəxslərin əmanətlərinin, 118,65 milyon manatı isə təcili depozitlərin payına düşüb.
Bankın kredit portfeli 2,5 faiz artaraq 184,223 milyon manat təşkil edib. Noyabrın 1-nə bankın kredit portfelində istehlak kreditlərinin payı 129,84 milyon manat, kommersiya kreditlərinin payı isə 47,22 milyon manat səviyyəsində olub.
Noyabrın 1-nə bankın məcmu kapitalı 38,38 milyon manat təşkil edib. Bankın ödənilmiş nizamnamə kapitalı 12,852 milyon manatdır.
"Bank of Baku" 2005-ci ildə iki yerli özəl bank olan "Bank of Baku" ASC və "İlkBank" KB-nin birləşməsi nəticəsində yaranıb.
Dekabrın 9-na olan rəsmi məzənnə 0,7990 AZN/USD təşkil edir.