Azərbaycan, Bakı, 24 dekabr /Trend, müxbir N.İsmayılova/
Cari ilin dekabr ayının əvvəlinədək Alman-Azərbaycan Fondu (AAF) öz vəsaitləri hesabına ümumi məbləği 102,9 milyon avro olan 26,2 min krediti maliyyələşdirib. Bu barədə cümə günü AAF-in texniki meneceri Andreas Franke məlumat verib.
"Bu günə verilən kreditlərin ümumi miqdarının 73 faizi ölkə regionlarının, 26 faizi isə Bakının payına düşür", - Franke bildirib.
Onun sözlərinə görə, verilən kreditlərin beş faizi Sumqayıt şəhərinin, 11 faizi cənub, 23 faizi şimal-qərb, 18 faizi isə Aran rayonlarının payına düşüb. Noyabrın sonuna olan məlumata görə, verilən kreditlərin ümumi həcminin 39 faizi Bakının payına düşür.
"Fond son aylar ərzində Bakıda kreditləşdirmənin həcmini azaltmağa və diqqəti daha çox ölkənin regionlarına cəmləşdirməyə nail ola bilib", - o deyib.
Bu gün verilən kreditlərin ümumi həcmində AAF-in kredit portfelinin strukturu aşağıdakı kimi bölüşdürülüb: 67 faiz ticarət, 18 faiz xidmətlər, 11 faiz istehsal və dörd faiz kənd təsərrüfatının payına düşür. Verilən kreditlərin həcmi üzrə portfelin strukturu sektorlar arasında bölüşdürülüb. Belə ki, 60 faiz ticarətin, 23 faiz xidmətlərin, 11 faiz istehsalın, altı faiz isə kənd təsərrüfatının payına düşür.
"Hazırda kənd təsəsrrüfatının kreditləşməsində artıma meyl müşahidə olunur ki, bu, gələcəkdə də davam edəcək. Noyabrda verilən kreditlərin ümumi sayının 40 faizi və ümumi məbləğin 24 faizi bu sektorun payına düşür", - Franke bildirib.
Onun sözlərinə görə, verilən kreditlərin alıcılarının 82 faizi kişilər, 18 faizi qadınlardır. Bu gün fondun cari portfeli 10 milyon avro təşkil edir ki, bu vəsaitin hesabına 5187 kredit verilib. Verilən kreditlərin 97 faizindən hər bir borcun məbləği 15 min avronu ötmür. Bununla yanaşı, hər biri beş min avro olmaqla, kiçik kreditlərin payı bu göstəricinin 90 faizini təşkil edir.
"Bu gün fondun risk altında olan portfelinin payı son bir neçə ayda 3,4 faiz azalaraq 2,2 faiz təşkil edir", - o bildirib.
Hazırda fondun fəaliyyəti 36 xidmət nöqtəsinin fəaliyyət göstərdiyi 16 regionu əhatə edir.
Fond tərəfindən maliyyələşdirmə 2001-ci ildə KfW krediti hesabına başlayıb. Almaniya bankı AAF-ə iki tranşla 8,7 milyon avro təqdim edib. Onların və AYİB-in kredit ehtiyatlarının mənimsənilməsi başa çatıb, çünki hazırda yerli bankların maliyyələşdirilməsi revolver hesabdan həyata keçirilir. AYİB bankların AAF vasitəsilə maliyyələşdirilməsinə 2006-cı ildə Azərbaycanda mikro və kiçik sahibkarlıq üçün ictimai çərçivə maliyyə xidmətlərinin mexanizmi (AMBF-MSE) çərçivəsində qoşulub.
AAF-in yaradılması haqqında saziş 1999-cu ildə imzalanıb, kreditlərin verilməsi 2001-ci ilin martında başlayıb. 2001-ci ilin martından AAF-in tərədaşları "Bank of Baku" və "Unibank", 2003-cü ilin yanvarından "Parabank" və "Bank Respublika", 2004-cü ilin sentyabrından "Azərdəmiryolbank" və "Azəriqazbank", 2006-cı ilin dekabrından "Rabitəbank və MuğanBank", 2007-ci ilin fevralından isə "Nikoil Bank"dır.
