Azərbaycan, Bakı, 10 fevral /Trend, müxbir İ.Xəlilova/
2011-ci il martın ortalarında Brüsseldə Azərbaycan hökuməti və Avropa Komissiyası arasında assosiativ sazişin imzalanması üzrə danışıqların növbəti raundunun keçirilməsi planlaşdırılır. Bu barədə cümə axşamı Trend-ə Azərbaycan xarici işlər nazirinin müavini Mahmud Məmmədquliyev deyib.
"Plenar iclaslarla yanaşı, həftədə bir dəfə danışıqlar prosesinin iqtisadi və sosial-humanitar aspektlərinin müzakirəsi üzrə videokonfranslar keçirilir. Ədliyyə və insan hüquqlarının qorunması bölməsi üzrə də müzakirələrə başlanılıb, lakin "siyasi dialoq" və "ticarət" istiqamətlərini əhatə edən digər işçi qrupların da qoşulması istisna edilmir", - nazir müavini qeyd edib.
Məmmədquliyevin sözlərinə görə, Azərbaycan üçün uzunmüddətli əməkdaşlığa görə ölkənin Aİ ilə fəaliyyətinin bütün aspektlərini əhatə edəcək keyfiyyətli sənədin hazırlanması vacibdir. Buna görə nazir müavini assosiativ sazişin mümkün imzalanması müddətini açıqlamaqda çətinlik çəkib.
"Yeni saziş qüvvəyə minənə kimi Azərbaycan Aİ ilə əməkdaşlığı 1996-cı ildə imzalanan və 1999-cu ildə qüvvəyə minən tərəfdaşlıq və əməkdaşlıq haqqında saziş əsasında davam etdirəcək. Bununla yanaşı, biz assosiativ sazişin imzalanması müddətini süni şəkildə uzatmaq niyyətində deyilik, çünki o, Aİ ilə gələcək əməkdaşlıq üçün hüquqi çərçivələr yaradacaq", - Məmmədquliyev vurğulayıb.
Assosiativ üzvlük üzrə danışıqlar ötən ilin iyulunda başlayıb.
Aİ tərəfindən sazişin Cənubi Qafqaz ölkələrinin hər biri ilə ayrı-ayrılıqda imzalanması nəzərdə tutulur və sənədin məzmunu Aİ ilə əməkdaşlığın səviyyəsindən asılı olacaq. Bundan başqa, Avropa İttifaqı ölkələri ilə viza rejiminin sadələşdirilməsi üzrə ayrıca sazişin imzalanması planlaşdırılıb.
Assosiativ sazişə dörd istiqamət - siyasi dialoq, o cümlədən təhlükəsizlik, ədliyyə və insan hüquqlarının qorunması məsələləri, iqtisadi və sosial-humanitar və ticarət məsələləri daxildir.
Sonuncu istiqamət gələcəkdə Azərbaycan məhsullarının Aİ-yə ixracı üçün imkan yaradacaq. Azərbaycan artıq Avropa İttifaqı ölkələrinə bir neçə min növ məhsulun rüsumsuz ixracı üzrə güzəştlərdən istifadə edir, lakin təəssüf ki, bu məsələdə malların keyyfiyəti əsas problem olaraq qalır.
Assosiasiya haqqında gələcək saziş 1995-ci ildə Azərbaycanla Aİ arasında tərəfdaşlıq və əməkdaşlıq haqqında imzalanan sazişi əvəz edəcək. O, prioritet istiqamətlərdə əməkdaşlığın əhəmiyyətli dərinləşməsini nəzərdə tutur.
Cənubi Qafqaz ölkələrinin münaqişələrin həlli və bu ölkələr üçün daxili islahatların aparılmasına təsirli stimul olan və Aİ-yə gələcək assosiativ üzvlüyün perspektivləri barədə qərar 2009-cu il sentyabrın 30-da Brüsseldə Cənubi Qafqaz ölkələri ilə əməkdaşlıq haqqında Aİ Şurasının illik sessiyası zamanı qəbul edilib.
