Azərbaycan, Bakı, 14 mart /Trend, müxbir N.İsmayılova/
Azərbaycan bankı "AmrahBank" 2011-ci ildə 2,5 milyon manat həcmində gəlir əldə edəcəyini gözləyir. Bu barədə bazar ertəsi bankın Biznesin inkişafı departamentinin direktoru Xaliq İldırımzadə deyib.
"2011-ci ildə bank ildə 2,5 milyon manat həcmində gəlir əldə edəcəyinə ümid edir. Bankın fəaliyyəti problemli kreditlərin həcminin azaldılmasına da yönəlib. Ötən il bir milyon manat həcmdə ehtiyat fondu, eləcə də yeni kreditlər üzrə monitorinq qrupu yaradılıb", - İldırımzadə qeyd edib.
Onun sözlərinə görə, bank daşınmaz əmlak və istehsal kimi sektorların kreditləşdirilməsini minimallaşdırıb, çünki ən çox problemli kreditlər bu sahədədir.
Ötən ilin üç rübünün yekunları üzrə bankın gəliri 1,649 milyon manat təşkil edib.
"AmrahBank" (1993-cü ildə yaradılıb) Azərbaycanın ilk kommersiya banklarından biridir. O, filiallarının sayına (23 filial) görə yerli banklar arasında liderdir. Bankın nizamnamə kapitalı 14 milyon manatı ötür. Bankın səhmlərinin 49 faizi Bəhreyndə yerləşən Beynəlxalq İnvestisiya Bankına məxsusdur.
Martın 14-nə olan rəsmi məzənnə 0,7933 AZN/USD təşkil edir.