...

Azərbaycan bankı "DəmirBank" 2012-ci ilədək korporativ idarəetmənin inkişaf səviyyəsi üzrə 100 faizlik göstəriciyə nail olmaq fikrindədir

Biznes və iqtisadiyyat xəbərləri Materials 30 Mart 2011 10:58 (UTC +04:00)

Azərbaycan, Bakı, 30 mart /Trend, müxbir N.İsmayılova/

Azərbaycan bankı "DəmirBank" öz fəaliyyətinin keyfiyyətini yaxşılaşdırmaq məqsədilə korporativ idarəetmənin daimi inkişafını hədəfləyib. Bu barədə çərşənbə axşamı jurnalistlərə bankın idarə heyətinin sədri Roman Əmircanov məlumat verib.

"Əgər Mərkəzi Bankın sorğu vərəqəsinə görə, biz inişil bankda korporativ idarəetmənin inkişaf səviyyəsi üzrə cəmi 45 faiz toplamışdıqsa, ötən il biz bu göstəricini 75 faizədək artırdıq, cari ilin sonu-2012-ci ilin əvvəlində bu göstəricini 100 faizə çatdırmağı planlaşdırırıq", - Əmircanov bildirib.

Onun sözlərinə görə, dünya maliyyə böhranı bu istiqamətdə fəaliyyəti yaxşılaşdırmaq məqsədilə hələ çox işlərin görülməsinin zəruri olduğunu göstərdi. Onun sözlərinə görə, bankın 2011-2013-cü illər üzrə strategiyası da korporativ idarəetmənin təkmilləşdirilməsini nəzərdə tutur, hərçənd ki, bu gün bankın reallaşdırdığı ən iri layihə SAP həllərinin tətbiqidir.

"Bank hər il inkişafın institusionallaşdırılmasına bir milyon manata yaxın vəsait xərcləyir ki, bunun 500 min manata yaxını texniki məsələlərin həllinə yönəlib", - o bildirib.

Ölkənin ilk banklarından olan "DəmirBank" (əvvəlki adı "Azərdəmiryolbank") 1989-cu ildə fəaliyyətə başlayıb. Bankın səhmdarları sırasına beynəlxalq maliyyə təşkilatları olan Avropa Yenidənqurma və İnkişaf Bankı və Niderland İnkişaf Maliyyə Şirkəti (FMO) daxildir.

Xəbər lenti

Xəbər lenti