Bakının avtomobil bazarında təklif 10 faiz artıb

Azərbaycan, Bakı, 24 may /Trend, müxbir A.Axundov/

Apreldə Bakının avtomobil bazarında təklif 10,4 faiz artıb. Bu barədə "Əmlak Bazarı İştirakçıları" İctimai Birliyindən (İB) çərşənbə axşamı verilən məlumatda deyilir.

Məlumatda bildirilir ki, apreldə artıma baxmayaraq, hələ də bazarda təkliflərin real tələbdən yüksək olması tendensiyası müşahidə olunur.

Həmçinin ay ərzində alqı-satqı müqavilələrinin bağlanmasında artım dinamikası müşahidə edilib, lakin bu, qiymətlərə ciddi təsir göstərməyib. Belə ki, apreldə qiymətlər marta nisbətən 0,3 faiz artaraq 15 115 dollar səviyyəsində qalıb.

Apreldə avtomobil bazarında aktivlik satış müddətinə təsir edib ki, bu zaman o 4,2 faiz azalaraq 51 günədək təşkil edib.

Arpel ayı ərzində təşkilat təkrar avtomobil bazarında monitorinq aparıb, bu zaman 10400-dən artıq avtomobil araşdırma predmeti olub ki, onların yalnız 24,5 faizi apreldə bazara çıxarılıb, yerdə qalan 75,5 faiz əvvəlki aydan qalıb. Buna səbəb idxalın, alıcılıq qabiliyyətinin azalması və tələbin kəskin aşağı düşməsidir. Köhnə avtomobillərin bazara kütləvi axını son üç ay ərzində nəzərəçarpacaq dərəcədə azalıb ki, bu da təklif əmsalının kəskin aşağı düşməsi ilə bağlıdır.

Təkrar bazarda liderlik mövqeyini qoruyub saxlayan "Mersedes" markalı avtomobillərə təklifin həcmi apreldə marta nisbətən 1,8 faiz artıb. Bazarda bu markadan olan avtomobillərin payı 30,3 faiz təşkil edir.

Bazarın portfelində 9 markadan olan avtomobillərin payı 86,2 faiz təşkil edir. Yerdə qalan 13,8 faiz 20-dən yuxarı avtomobil şirkətinin 80 markadan çox avtomobillərinin payına düşür.

Məlumata görə, ekspertlər hesab edirlər ki, indi avtomobil bazarında təkliflərin əsas hissəsini köhnə avtomobillər təşkil etsə də, yaxın gələcəkdə üstünlük 2003-cü ildən sonra istehsal olunan avtomobillərə veriləcək.