Azərbaycan, Bakı, 14 iyul /Trend/
Cari ilin yanvar-mayında Azərbaycana 20,84 min minik avtomobili idxal olunub ki, bu da ötən ilin analoji dövr göstəricisindən 14,8 faiz çoxdur. Bu barədə cümə axşamı Trend-ə Dövlət Statistika Komitəsindən məlumat verilib.
Məlumata görə, gətirilən minik avtomobillərinin ümumi dəyəri 206,1 milyon dollara yaxındır. Bu, 2010-cu ilin yanvar-may ayları ilə müqayisədə 35,7 faiz çoxdur.
Yanvar-mayda Azərbaycana 1875 ədəd yük avtomobili idxal olunub ki, bu da 2010-cu ilin analoji dövr göstəricisindən 4,5 faiz çoxdur. Gətirilən avtomobillərin ümumi dəyəri 35,5 milyon dollara yaxın təşkil edib ki, bu da 2010-cu ilin analoji dövr göstəricisi ilə müqayisədə 6,9 faiz aşağıdır.
Həmçinin, yanvar-mayda respublikaya 234 ədəd avtobus idxal olunub ki, bu da 2010-cu ilin yanvar-mayındakı göstəricindən 38,6 faiz azdır. Bu dövrdə idxal olunan avtobusların məbləği 10, 4 milyon dollar təşkil edib ki, bu da ötən ilin analoji dövründə qeydə alınan göstəricidən 48,9 faiz azdır.
Bu ilin yanvar-iyununda Azərbaycanda 383 ədəd yük avtomobili istehsal olunub ki, bu göstərici ötən ilin müvafiq dövründəkindən 39,3 faiz çoxdur. Eləcə də həmin dövrdə ölkədə 172 minik avtomobili buraxılıb. Bu, ötən ilin eyni dövrünün göstəricisindən 20 faiz azdır.
