Azərbaycan, Bakı, 19 iyul /Trend, müxbir E.İsmayılov/
Avqustun sonunadək Koreyanın "Dongsung Engineering" şirkəti Bakı buxtası üzərindən körpünün inşası layihəsinin texniki-iqtisadi əsaslandırmasının (TİƏ) yekun variantını Nəqliyyat Nazirliyinə və ictimaiyyətə təqdim edəcək. Bu barədə çərşənbə axşamı Trend-ə şirkətdəki mənbə məlumat verib.
Onun sözlərinə görə, şirkət artıq nazirliyə TİƏ-nin ilkin variantını təqdim edib və müvafiq dövlət strukturlarından rəyin alınması üçün təqdimat keçirib.
"Rəylər alındıqdan sonra TİƏ-yə əlavə və düzəlişlər ediləcək, bundan sonra gələn ayın sonunadək sənədin yekun variantı nazirliyə, eləcə də ictimaiyyətə təqdim olunacaq", - mənbə bildirib.
Nəqliyyat Nazirliyinin Nəqliyyat siyasəti və iqtisadiyyat şöbəsinin müdiri Sədrəddin Məmmədovun sözlərinə görə, koreyalı mütəxəssislərin təqdim etdikləri TİƏ-nin ilkin variantı düzəlişlər edilməsi üçün qaytarılıb.
İlkin məlumatlara görə, körpünün tikintisi 1,8 milyard dollara başa gələ bilər.
Koreya mütəxəssislərinin hazırladıqları layihə təqsdiqlənərsə, beynəlxalq konsorsium yaradılacaq və o, konsorsium tərəfindən körpünün işlənməsi, layihələndirilməsi, tikintisi və istismarına investisiyaların qoyuluşunun nəzərdə tutan "building - operation - transfer" prinsipi üzrə çalışacaq.
Yeni körpü ona qoyulan vəsaiti çıxarandan sonra konsorsium onu Azərbaycana verəcək. Azərbaycan tərəfdən bu layihəyə sərmayə qoyulması nəzərdə tutulmayıb.
Layihənin hazırlanması 2-3 il, tikinti prosesi isə 3 il vaxt apara bilər.
