Azərbaycan, Bakı, 19 sentyabr /Trend, müxbir N.İsmayılova/
2012-ci ilin sonunadək Bakı-Tbilisi-Qars dəmir yoluna ilk sınaq qatarı buraxılacaq. Trend-in məlumatına görə, bu barədə jurnalistlərə nəqliyyat nazirinin müavini Musa Pənahov bildirib.
"Hazırda tikinti işləri aktiv şəkildə aparılır. Gələn ilin sonunadək biz ilk sınaq qatarının buraxılmasını planlaşdırırıq, bundan sonra işlər davam etdiriləcək", - Pənahov deyib.
Bakı-Tbilisi-Qars layihəsi çərçivəsində dəmiryol magistralının yeni 105 km-lik qolunun tikintisi də planlaşdırılır. Bunun 76 km-i Türkiyə, 29 km-i isə Gürcüstan ərazisindən keçəcək. Bundan əlavə, nəqletmə gücünü ildə 15 milyon ton yükə çatdırmaq üçün Gürcüstanda Axalkalaki-Marabda-Tbilisi dəmir yolunun 183 kilometrlik hissəsi yenidən qurulacaq.Axalkalakidə Gürcüstanda mövcud olan dəmiryol təkərlərinin Avropa standartlarına uyğun təkərlərlə əvəz edilməsi üzrə məntəqələrin tikilməsi də planlaşdırılır.
Bundan əvvəl Azərbaycanın nəqliyyat naziri Ziya Məmmədovun verdiyi məlumata görə, tikinti işlərinin 2012-ci ilin birinci yarısında başa çatdırılması planlaşdırılıb. Lakin layihənin həyata keçirilmə müddətinin razılaşdırılmasına baxmayaraq, tərəflər prosesin sürətləndirilməsi və işlərin böyük hissəsinin 2011-ci ilin sonunadək başa çatdırılması üzərində işləyirlər.
Dəhlizin yüksək buraxılış qabiliyyəti 17 milyon ton yük olacaq. İlkin mərhələdə bu göstərici 1 milyon sərnişin və 6,5 milyon ton yük təşkil edəcək.