Azərbaycan, Bakı, 26 sentyabr /Trend, müxbir N.İsmayılova/
"AzMeCo" şirkəti Azərbaycanda istehsal olunan metanolun Avropa bazarlarına ixracı imkanlarına baxır. Bu barədə bazar ertəsi Trend-ə şirkətin idarə heyətinin sədri Nizami Piriyev bildirib. Əvvəllər şirkət ixracın Asiya bazarlarına yönəldilməsini planlaşdırmışdı.
"Biz Azərbaycanda zavod tikənədək Misirdə, Omanda, Bəhreyndə bir çox analoji müəssisələr açılıb, Səudiyyə Ərəbistanı isə istehsal gücünü artırıb. Bu gün Avropa bazarları zavodumuzda istehsal olunan metanolun ixracı üçün daha cəlbedicidir", - Piriyev deyib.
Onun sözlərinə görə, Türkiyə və İran kimi ölkələrdə metanola tələbat artır. Misal üçün Türkiyənin metanola tələbatı ildə 400 min tona çatıb. Piriyev logistika baxımından bunu şirkət üçün sərfəli hesab edir.
"Şirkət Gürcüstanın Poti limanında infrastrukturun tikintisini başa çatdırır, metanol oradan dəmir yolu və ya dəniz nəqliyyatının köməyi ilə Türkiyəyə və Avropaya satılacaq. Terminalın buraxılış qabiliyyəti zavodun gücünə müvafiq olacaq", - o deyib və əlavə edib ki, terminalın tikintisi 2012-ci ilin iyununda başa çatacaq.
"AzMeCo" 2007-ci ildə yaradılıb. Şirkət öz portfelinə Xəzər hövzəsindəki beynəlxalq karbohidrogen layihələrinin əlavə edilməsi ilə Azərbaycanın qeyri-neft sektoruna investisiya qoyuluşunun baş planını hazırlayıb.
Metanol zavodu Cənubi Qafqazda və Orta Asiyada yeganə zavod olacaq. O, 2012-ci ildə istismara veriləcək. Ölkədə metanol istehsalının gücü 2012-ci ilin sonlarında ildə 720 min ton təşkil edəcək.
Zavodun tikinti layihəsinin ümumi dəyəri 360 milyon dollardır, bu gün layihənin maliyyələşdirilməsi artıq başa çatıb.
