Azərbaycan, Bakı, 28 sentyabr /Trend, müxbir İ.Xəlilova/
Azərbaycan Beynəlxalq Valyuta Fondundan (BVF) dövlət maliyyə statistikası - GFS-2001 (Government Finance Statistics) üzrə Fondun standartının tətbiqində yardım etməsini istəyib. Bu barədə Trend-ə çərşənbə günü ölkə hökumətindən bildiriblər.
"Ölkənin Maliyyə Nazirliyi yanında Dövlət Xəzinədarlığı Agentliyinə texniki yardım göstərilməsi çərçivəsində İrina Dubininanın başçılıq etdiyi BVF missiyası Bakıdadır, - hökumətdən deyiblər. - GFS-2001 standartının Rusiyada tətbiqi ilə məşğul olan ekspert Anton Dubovik də missiyanın tərkibindədir".
Missiya işini cümə gününədək davam etdirəcək.
Xəzinədarlığın əsas vəzifəsi dövlət maliyyə statistikasının milli standartlarının beynəlxalq standartlara uyğunlaşdırılmasıdır. Dövlət maliyyə statistikası iqtisadiyyatda dövlət idarəetmə sektorunun maliyyə fəaliyyətini ölçür.
BVF hər il GFS-2001 üzrə üzv dövlətlərin statistikasını dərc edir. Lakin Azərbaycan son dəfə Fonda ətraflı məlumatı 1999-cu ildə təqdim edib.
