Azərbaycan, Bakı, 4 noyabr / Trend, müxbir N.İsmayılova/
Avropa Yenidənqurma və İnkişaf Bankının (AYİB) nümayəndə heyəti "CAREC-2020" nazirlər konfrasında iştirak etmək üçün Azərbaycana gələcək. Bu barədə dünən AYİB-in Bakı ofisinin rəhbəri Neyl Makkeyn (Neil Mckain) jurnalistlərə bildirib.
"Bankın Cənubi Qafqaz ölkələri, Moldova və Belarus üzrə regional direktoru Pol-Anri Forester iki həftədən sonra Bakıya səfəri çərçivəsində ölkə hökumətinin nümayəndələri ilə bir sıra görüşlər keçirəcək", - Makkeyn deyib.
Onun sözlərinə görə, Bakıda "CAREC-2020" konfrasında iştirak etmək üçün habelə AYİB-in Cənubi və Şərqi Avropa, Qafqaz və Orta Asiya ölkələri üzrə biznes qrupunun direktoru Olivye Dekamp da Bakıya gələcək.
Bir qədər əvvəl xəbər verildiyi kimi, Asiya İnkişaf Bankının (AİB) prezidenti Xaruxiko Kuroda noyabrın 23-25-də "CAREC-2020" konfransında iştirak etmək üçün Azərbaycana səfər edəcək.
İclasda son on il ərzində CAREC-in fəaliyyəti qiymətləndiriləcək və sonrakı on il üçün yeni strategiya təqdim olunacaq.
1997-ci ildə yardılan CAREC proqramının 10 üzvü var: Əfqanıstan, Azərbaycan, Çin Xalq Respublikası, Qazaxıstan, Qırğızıstan, Monqolustan, Pakistan, Tacikistan, Türkmənistan və Özbəkistan. CARES-in həmçinin 6 beynəlxalq tərəfdaşı var: Asiya İnkişaf Bankı (AİB), Avropa Yenidənqurma və İnkişaf Bankı (AYİB), Beynəlxalq Valyuta Fondu (BFV), İslam İnkişaf Bankı (İİB), Birləşmiş Millətlər Təşkilatının İnkişaf Proqramı (UNDP) və Dünya Bankı.
Kuroda sonuncu dəfə Azərbaycana 2008-ci ilin noyabrında səfər edib. AİB 2001-ci ildən CAREC Katibliyidir.
2009-cu ildə AYİB Azərbaycanda ümumi məbləği 232 milyon dollar həcmdə doqquz layihəyə sərmayə qoyub. 2010-cu ildə AYİB 79 milyon dollarlıq 13 layihəni maliyyələşdirib. 2011-ci ildə bank 14 layihənin həyata keçirilməsinə 90 milyon dolalr vəsaitin ayrılmasının planlaşdırır.
Bank vəsaitlərindən Mərkəzi Avropa və Mərkəzi Asiyanın 30 ölkəsində demokratiyanın və bazar iqtisadiyyatının qurulması məqsədilə istifadə olunan maliyyə institutudur. 61 ölkə və iki beynəlxalq təşkilat onun sahibidir.