Azərbaycan, Bakı, 11 noyabr /Trend, müxbir N.İsmayılova/
2011-ci ilin 9 ayında Azərbaycan Mərkəzi Bankı (AMB) tərəfindən 497 milyon dollar həcmində valyuta sterilizasiyası həyata keçirilib. Trend-in məlumatına görə, bu barədə cümə günü AMB-nin dərc etdiyi pul siyasəti icmalında deyilir.
2011-ci ilin 9 ayı ərzində Mərkəzi Bank özünün məzənnə siyasətini yeni əməliyyat mexanizmi çərçivəsində və valyuta bazarında təklif kanallarının genişlənməsi şəraitində həyata keçirməyə davam edib. İlin əvvəlindən bəri Mərkəzi Bank özünün məzənnə siyasətini dəhliz daxilində ABŞ dolları/manat ikitərəfli məzənnəsinin hədəflənməsi çərçivəsində həyata keçirməyə başlayıb. Kommunikasiya baxımından əlverişli olmaqla yanaşı, bu mexanizm həm də Mərkəzi Bankın uzunmüddətli perspektivdə sərbəst üzən məzənnə rejiminə keçmək imkanlarını artırır.
İcmalda deyildiyi kimi, ölkənin tədiyə balansında irihəcmli profisit, neft gəlirlərindən iqtisadi inkişaf məqsədlərinə istifadə edilməsi nəticəsində manatın məzənnəsinin möhkəmlənməsi müşahidə olunub. Lakin məzənnənin əhəmiyyətli möhkəmlənməsinin qarşısını almaq və bununla da qeyri-neft sektorunun rəqabət qabiliyyətinə neqativ təsirləri neytrallaşdırmaq üçün Mərkəzi Bank tərəfindən valyuta sterilizasiyası həyata keçirilib.
Hesabat dövründə manatın ABŞ dollarına qarşı məzənnəsi mülayim templə - cəmi 1.4% möhkəmlənib. Milli valyutanın məzənnəsinin sabitliyi dövr ərzində ölkədə makroiqtisadi və maliyyə sektorunun sabitliyinə müsbət təsir göstərib.
Dövr ərzində manatın nominal məzənnəsi ticarət partnyoru olan bəzi ölkələrin valyutalarına nəzərən ucuzlaşdığı halda, digər ölkələrin valyutalarına nəzərən möhkəmlənib. Manatın nominal ikitərəfli məzənnəsinin dinamikası real ikitərəfli məzənnələrin də dəyişməsinə təsir göstərib.
Yanvar-sentyabr aylarında manat bəzi ölkələrin (Avrozona, Gürcüstan, Yaponiya, Çin, C.Koreya) valyutalarına nəzərən həm nominal, həm də real olaraq ucuzlaşıb. ABŞ, B.Britaniya, Türkiyə, Ukrayna, İsrail, Belarus kimi ölkələrin valyutalarına nəzərən isə manat nominal və real olaraq bahalaşıb.
Hesabat dövründə qeyri-neft sektoru üzrə nominal effektiv məzənnə (ümumi ticarət dövriyyəsi üzrə) 3.4% bahalaşıb. Partnyor ölkələrdəki inflyasiya ilə Azərbaycandakı inflyasiya arasındakı fərq isə real effektiv məzənnəyə 1.5 faiz bəndi azaldıcı təsir göstərib. Nəticədə manatın qeyri-neft sektoru üzrə real effektiv məzənnəsi dövr ərzində cəmi 1.9% bahalaşıb.
