Azərbaycan, Bakı, 24 noyabr /Trend, müxbir İ.Xəlilova/
İlkin qiymətləndirmələrə görə, Azərbaycanın su təchizatı və kanalizasiya sistemlərinin tam bərpası üçün yeddi milyard manat tələb olunur. Trend-in məlumatına görə, bu barədə cümə axşamı maliyyə naziri Samir Şərifov parlamentdə 2012-ci il və sonrakı üç il üçün dövlət büdcəsi layihəsinin müzakirəsində bildirib.
"Ölkənin bütün regional mərkəzlərində müvafiq infrastrukturun yaradılmasına böyük maliyyə vəsaiti tələb olunur. Belə ki, yeni su və kanalizasiya şəbəkələrinin tikintisi, Bakı qəsəbələrində su təchizatı məsələləri və kanalizasiya xidmətlərinin inkişafı məsələləri həll olunacaq", - nazir deyib.
Onun sözlərinə görə, bu, çox böyük və çox əhəmiyyətli layihədir.
"Layihələrin həyata keçirilməsi üçün əlavə vəsaitlərə ehtiyac var. Belə infrastrukturun yaradılması məqsədilə ölkənin dövlət büdcəsindən maliyyə ayrılır. Ötən il olduğu kimi, bu il də fövqəladə halların (sellər nəticəsində) aradan qaldırılmasına kifayət həcmdə vəsait ayrılıb. Gələn il də su təchizatı layihəsinin həyata keçirilməsinə büdcədən vəsait ayrılacaq", - Şərifov deyib.
Noyabrın 24-nə olan rəsmi məzənnə 0,7865 AZN/USD təşkil edir.
