Azərbaycan, Bakı, 8 dekabr /Trend, müxbir A.Axundov/
MDB məkanında vahid valyutada qarşılıqlı hesablaşmalara keçid hələ çox tezdir. Belə ki, bunun üçün iqtisadi baza yoxdur. Bu barədə cümə axşamı Trend-ə Azərbaycan Banklar Assosiasiyasının prezidenti Eldar İsmayılov deyib.
"Bunun üçün bizdə iqtisadi baza yoxdur. Regionda təqdim edilən bütün milli valyutalar kifayət qədər zəifdir, o cümlədən Rusiya rublu. Rublun dünya iqtisadiyyatında xüsusi çəkisi çox aşağıdır, Rusiya iqtisadiyyatının özündə isə dollar və avro böyük paya sahibdirlər", - İsmayılov bildirib.
O qeyd edib ki, buna görə də bu, siyasi qərar ola bilər, lakin hələlik iqtisadi məqsədəuyğunluq kifayət qədər uzaqdadır.
Bir müddət əvvəl MDB İcraiyyə Komitəsinin sədri - icraçı katib Sergey Lebedev Bakıda keçirilən MDB iştirakçısı olan ölkələrin beynəlxalq bank konfransında deyib ki, MDB ərazisində vahid maliyyə-bank məkanının yaradılması üçün 2017-ci ilədək hesablanmış fəaliyyət planı hazırlanıb.
"Bu proses mərhələli şəkildə aparılmalıdır. Birinci mərhələ hesablaşmaların milli valyutada artırılmasını əhatə edir. Növbəti mərhələlər vahid valyutanın yaradılmasına gətirib çıxarmalıdır, lakin dövlətlər arasında vahid valyuta məsələsi üzrə razılaşma hələlik əldə edilməyib. Vahid valyuta qismində avras və ya rublun tətbiq edilməsi təklif edilirdi", - Lebedev bildirib.
Onun fikrincə, görünür, MDB-də gömrük ittifaqının və vahid iqtisadi məkanın yaradılması bu məsələnin həllini tezləşdirməyə məcbur edəcək.
Avrasiya İqtisadi Birliyi (AİB) ölkələrinin vahid dövlətlərarası ödəniş-hesablama vahidi qismində avrasın tətbiqi təşəbbüsü ilə Qazaxıstan Prezidenti Nursultan Nazarbayev 2009-cu ildə II Astana İqtisadi Forumunda çıxış edib.
Qazaxıstan Prezidentinin fikrincə, belə valyutanın məzənnəsi dünya valyutalarının dəyişməsindən asılı olmamalıdır.
"Yeni valyuta sistemi sabit uzunmüddətlı infrastruktur investisiya qoyuluşlarını və operativ mövcud əməliyyatları tətbiq etməyə imkan verəcək", - Prezident hesab edir.
Nazarbayevin qənaətincə, belə valyuta dövlətlər, hüquqi və fiziki şəxslər və AİB ölkələri arasında sabit ritmik nağdsiz əməliyyatları təmin etməlidir.
Onun fikrincə, belə elektron-hesablama vahidi, məsələn, "avras" və ya "avrasiya" adlana bilər.
