Azərbaycan, Bakı, 18 yanvar /Trend, müxbir E.İsmayılov/
Azərbaycan Nəqliyyat Nazirliyi 2012-ci ilin ikinci yarısından etibarən nəqliyyatı intellektual idarəetmə sisteminin tətbiq edilməsinin ikinci mərhələsinin həyata keçirilməsi çərçivəsində işlərə başlayacaq. Bu barədə çərşənbə günü Trend-ə nazirliyin mətbuat xidmətinin rəhbəri Namiq Həsənov bildirib.
Onun sözlərinə görə, hazırda Bakının nəqliyyat sistemini əhatə edən intellektual idarəetmə sisteminin birinci fazası çərçivəsində nəzərdə tutulan bütün proqramların instalyasiyası üzrə işlər aparılır. İkinci faza Bakının ətraf sahələrini, eləcə də Abşeron yarımadasını əhatə edəcək.
"Bu proses başa çatdıqdan sonra artıq ilin ikinci yarısından intellektual idarəetmə sisteminin ikinci fazası üzrə işlər başlayacaq", - Həsənov deyib.
Onun sözlərinə görə, bu layihənin həyata keçirilməsinin üçüncü fazası çərçivəsində Azərbaycanın bütün iri magistral yolları əhatə olunacaq.
Bakıda nəqliyyatın intellektual idarə edilməsi sisteminin tətbiqi yol nəqliyyat sahəsində və ictimai nəqliyyatda sərnişinlərin daşınması prosesində bir sıra çatışmazlıqların aradan qaldırılmasına imkan verəcək.
Dəyəri 95 milyon dollardan artıq olan nəqliyyatı intellektual idarəetmə sistemi ötən ilin dekabrında işə salınıb.
Bütün üç mərhələ işə salındıqdan sonra sistem Bakıdakı mərkəzdən idarə ediləcək.
Sistemin yaradılması Bakının küçələrində yerləşdirilən 664 ədəd informasiya terminalı və 48 ədəd informasiya lövhəsinin quraşdırılmasını nəzərdə tuturdu.
Sistemin tətbiqi çərçivəsində avtobus dayanacaqları üçün 639-a yaxın, taksilər üçün 140-a yaxın meydançanın yaradılması planlaşdırılırdı.
