Azərbaycan, Bakı, 13 fevral /Trend müxbir A. Axundov/
Azərbaycanın "Atəşgah" sığorta şirkəti 2012-ci ildə sığorta mükafatlarının həcminin 47 faiz artmasını gözləyir. Bu barədə bazar ertəsi Trend-ə şirkətdən bildiriblər.
"2012-ci ildə şirkətin mükafat yığımının proqnozu 27,5 milyon manat səviyyəsində müəyyənləşdirilib" , - şirkətdən məlumat verilib.
Azərbaycan Maliyyə Nazirliyi yanında Dövlət Sığorta Nəzarəti Xidmətinin məlumatına əsasən, şirkət 2011-ci ildə sığorta mükafatlarının həcmi üzrə 18,547 milyon manatla bazarda dördüncü olub.
"Əvvəlki illərdə olduğu kimi şirkətin strategiyası təkcə icbari sığorta növləri üzrə deyil, həm də könüllü sığorta növləri üzrə də keyfiyyətli xidmətlərin göstərilməsi, avtomobil sığortası bazarının lideri mövqeyini qoruması, Azərbaycanın regionlarında əlavə ofislərin açılması, əhaliyə göstərilən xidmətlərin keyfiyyətinin daim təkmilləşdirilməsidir" , - şirkətdən deyiblər.
"Atəşgah" sığorta şirkəti 1996-cı ilin sonunda təsis edilib və "Atəşgah" Sığorta Qrupuna daxildir.
Şirkət müştərilərinə 20-dən çox sığorta növü üzrə xidmət göstərir.
Fevralın 13-nə olan rəsmi məzənnə 0,7863 AZN/USD təşkil edir.