Azərbaycan, Bakı, 17 may /Trend/
"Azərikimya" İstehsalat Birliyinin nümayəndələri Türkiyənin İzmir şəhərində keçirilmiş Beynəlxalq "PLASTECH-2012" - plastik məmulatlar və texnologiyalar sərgisində iştirak etmişlər.
İB-dən Trend-ə verilən məlumata görə, İzmir şəhər meriyasının, Türkiyənin Sənaye Palatasının və dünyanın bir çox nüfuzlu şirkət rəhbərlərinin iştirakı ilə təntənəli açılışı keçirilərək, dörd gün fəaliyyət göstərmiş sərgidə "Azərikimya" İB də "Petkim Petrokimya Holding" şirkətlər qrupu ilə yanaşı bir pavilyonda geniş bir stendlə təmsil olunmuşdur. "Azərikimya" üçün ayrılmış sahədə Birliyin müəssisələrində son iki ildə aparılmış yeniləşmə işlərindən sonra müasir görkəm almış istehsalat və qurğuların iri fotoşəkillərinin, bannerlərin fonunda Azərbaycan kimyaçılarının istehsal etdikləri qiymətli kimyəvi məhsulların - yüksək təzyiqli polietilenin, mütləq izopropil spirtinin, müxtəlif qətranların və s. nümunələri nümayiş etdirilmişdir.
Sərgidə Türkiyənin İstanbul, Ankara, İzmir, Kayseri, Manisa, Uşak və digər şəhərlərinin 150-yə yaxın şirkəti müxtəlif məhsul və texnologiyalarla iştirak edirdilər. Tədbirin ilk günündə Yaponiya, Almaniya, Rusiya, Braziliya, Çin, Fransa, Cənubi Koreya, Hollandiya, İspaniya, Gürcüstan, İraq, Makedoniya və İordaniyadan gələn qonaqlarla bərabər yeganə Azərbaycan təmsilçisi olan "Azərikimya" İB-nin nümayəndələri İzmir Ölkələrarası Sərgi Mərkəzində təşkil olunmuş ekspozisiyalarla, yeni məhsul və texnologiyalarla yaxından tanış olmuşlar.
Diqqətəlayiqdir ki, sərgidə "Azərikimya" İB-yə və onun istehsal etdiyi məhsullara maraq göstərən bir çox yerli və xarici şirkətlər Azərbaycan kimyaçıları ilə işgüzar münasibətlər qurmaq, Birliyin müəssisələri ilə inteqrasiya əlaqələri yaratmaq istəklərini ifadə etmişlər. "Azərikimya"nın nümayəndə heyəti də öz növbəsində yeni, qabaqcıl texnologiyaların yaradıldığı və tətbiq edildiyi nüfuzlu firma və şirkətlərin nümayəndələri ilə görüşərək, gələcək işgüzar münasibətlərin təməlini qoymuşlar.
Kimyaçılarımızın İzmirdə səfərdə olan nümayəndə heyəti Beynəlxalq sərgidə iştirak etməklə yanaşı "Petkim" Şirkətində də olmuş, onun müəssisə və istehsalatlarını gəzərək, orada tətbiq olunan yeni texnologiyalar, müasir nəzarət-ölçü, energetika, texniki təhlükəsizlik və əməyin mühafizəsi sistemləri ilə maraqlanmış, türkiyəli həmkarları ilə müxtəlif istehsalat məsələləri ilə bağlı fikir mübadiləsi aparmışlar.
"Azərikimya"nın nümayəndələri "Petkim Petrokimya Holding" şirkətlər qrupunun rəhbəri Hayati Öztürk ilə birgə regionun bu ən iri və nüfuzlu neft-kimya kompleksində növbəti təcrübə mübadiləsi keçmiş gənc azərbaycanlı kimyaçı mütəxəssislərə "Petkim" Şirkəti tərəfindən sertifikatların təqdimedilmə mərasimində iştirak etmişlər.
