Azərbaycan, Bakı, 21 sentyabr /Trend, müxbir A.Axundov/
VISA beynəlxalq ödəniş sistemi təşkilata üzv olan Azərbaycan banklarının siyahısını genişləndirmək niyyətindədir. Bu barədə cümə günü Trend-ə şirkətin MDB və Şərqi Avropa ölkələri üzrə baş direktoru Jan-Mark Tonti bildirib.
"Bu gün Azərbaycanın 35 bankı VISA-nın üzvüdür [ölkədə 43 bank fəaliyyət göstərir]. Onlar müxtəlif statusa malikdirlər və bundan asılı olaraq müxtəlif hüquqlara malikdirlər. Biz Azərbaycanda çalışdığımız bankların siyahısını genişləndirməyə çalışırıq", - Tonti deyib.
Onun sözlərinə görə, Azərbaycanda 3,6 milyon VISA kartı dövriyyədədir.
"2011-ci ilin iyunundan 2012-ci ilin iyununadək kartların artımı 54 faiz təşkil edib", - Tonti bildirib.
Azərbaycanda kartların sayının artırılması VISA-nın birinci dərəcəli vəzifəsi deyil.
"Azərbaycanda beş milyondan artıq plastik kart var ki, bunun 3,6 milyonu bizimdir. Bu da pis göstərici deyil. Bu gün məqsəd kartların qəbul məntəqələrinin sayının və bununla da kart istifadəçilərinin sayının artırılmasıdır. Bu, son nəticədə kartların sayının artmasına gətirib çıxaracaq. Biz bütün cəmiyyəti, hər bir vətəndaşı əhatə etməyə çalışırıq", - Tonti deyib.