Azərbaycan, Bakı, 10 oktyabr /Trend, müxbir A.Tağıyeva/
İslam Əməkdaşlıq Təşkilatı (İƏT) ölkələri arasında münasibətlərin 10 illik inkişaf proqramı çərçivəsində 2015-ci ilədək təşkilata üzv ölkələr arasında ticarət dövriyyəsinin payını bu ölkələrin ümumi ticarət dövriyyəsində 20 faizə çatdırmaq planlaşdırılır. Trend-in məlumatına görə, bu barədə İƏT-in baş direktoru Ekmələddin İhsanoğlu təşkilatın Ticarət əməkdaşlığı üzrə komitəsinin konfransında deyib.
Onun sözlərinə görə, 2004-cü ildə İƏT ölkələri arasında ticarət dövriyyəsinin payı 14 faiz, 2008-ci ildə isə 18 faiz olub. Buna görə də qarşıya qoyulan tapşırığı (ticarət dövriyyəsini 20 faizə çatdırmaq) reallaşdırmaq mümkündür.
İhsanoğlu İƏT-in iştirakçı ölkələrinin özəl sektorunu ticarət münasibətlərinin inkişafında rollarını artırmağa çağırıb.
O, həmçinin qeyd edib ki, İƏT nəqliyyat, enerji və ticarət sahəsində birgə layihələrə investisiyaların həcmini artırmağı planlaşdırır.