Azərbaycan, Bakı, 13 noyabr /Trend, müxbir C.Nəsibova/
Böyük Britaniyanın Baş naziri Devid Kemeron ölkənin Azərbaycandakı yeni ticarət nümayəndəsini təyin edib. Bu barədə Trend Böyük Britaniyanın ticarət və investisiyalar departamentinin (UKTI) rəsmi saytına istinadən məlumat verir.
Ticarət nümayəndəsi vəzifəsinə Böyük Britaniya parlamentinin üzvü Çarlz Henri təyin edilib. O, eyni zamanda Qazaxıstan və Türkmənistanda ticarət məsələləri üzrə nümayəndə olacaq.
"Əgər biz iş, ticarət və investisiyalar üzrə beynəlxalq yarışların qalibi olmaq istəyiriksə, ölkəmizin kreativliyini və dinamikliyini dünyaya göstərməliyik və mən şadam ki, parlament üzvləri Britaniyanın sahibkarlıq fəaliyyətinin inkişafında öz təcrübəsini bölüşməyə razılaşıb", - Kemeron qeyd edib.
Beynəlxalq səviyyədə iqtisadi əlaqələrin inkişafı üçün Böyük Britaniyanın ticarət məsələləri üzrə həmçinin Küveyt, Mərakeş, İndoneziya, Fələstin, Əlcəzair və digər ölkələrdəki diplomatik nümayəndələri təyin ediliblər.
Onların üzərinə sürətlə inkişaf edən bazarları və yüksək iqtisadi artım templəri ilə adıçəkilən ölkələrdə Britaniya şirkətləri vasitəsilə ticarəti inkişaf etdirmək tapşırığı qoyulub.
