Azərbaycan, Bakı, 8 yanvar /Trend, müxbir E.İsmayılov/
Azərbaycan Respublikası Dövlət Neft Fondu (ARDNF) indiyədək 14,934 ton qızıl alıb. Bu barədə çərşənbə axşamı Trend-ə Fonddan məlumat verilib.
ARDNF-dən deyildiyi kimi, Nazirlər Kabinetinin qərarı ilə Fondun ehtiyacları üçün ölkəyə idxal edilən qızılın gömrük rüsumlarından və ƏDV-dən azad edilməsinə baxmayaraq, Fond hələ ölkəyə qızılın gətirilməsinə başlamayıb.
"Fondun aldığı qızılın ölkəyə gətirilməsinə yaxın vaxtlarda başlanacaq. Proses mərhələli şəkildə həyata keçiriləcək", - ARDNF-dən bildiriblər.
İlkin mərhələdə Fond tərəfindən respublikaya gətiriləcək qızıl Azərbaycan Mərkəzi Bankında saxlanacaq. "Qızıl hələ ARDNF-nin yeni inzibati binasının inşası qurtaranadək müvəqqəti saxlamaq üçün Mərkəzi Bankın anbarına veriləcək", - Fonddan vurğulayıblar.
ARDNF-dən deyildiyi kimi, Fondun yeni binasında alınan qızılın saxlanması üçün anbar nəzərdə tutulub.
