Azərbaycan, Bakı, 25 yanvar /Trend, müxbir A.Axundov/
2013-cü ilin dekabr ayında Azərbaycanda istehlak mallarının qiymətləri və xidmət tarifləri noyabrla müqayisədə 1,9 faiz bahalaşıb. Trend-in məlumatına görə, bu barədə Dövlət Statistika Komitəsinin hesabatında bildirilir.
Hesabatda qeyd olunur ki, dekabrda ərzaq məhsullarının qiymətləri 2,6 faiz, qeyri-ərzaq məhsullarının qiymətləri 2,7 faiz, əhaliyə göstərilən pullu xidmətlərin tarifləri 0,4 faiz artıb.
2013-cü ildə 2012-ci ilə nisbətən istehlak mallarının qiymətləri və xidmət tarifləri 2,4 faiz, o cümlədən ərzaq məhsullarının qiymətləri 2,2 faiz, qeyri-ərzaq mallarının qiymətləri 0,8 faiz, xidmət tarifləri 3,5 faiz bahalaşıb.
Dekabr ayında mövsümi amillərlə bağlı olan məhsul (meyvə və tərəvəz) və xidmətlər nəzərə alınmamaqla dövlətin tənzimlədiyi istehlak qiymətlərinin indeksi əvvəlki ayla müqayisədə 0,5 faiz, il ərzində isə 0,7 faiz bahalaşıb.