Azərbaycan, Bakı, 10 fevral /Trend, müxbir E.Əliyev/
Azərbaycanda ödəniş kartlarının sayı 2013-cü ilin dekabrı aynda cüzi artaraq (noyabr ilə müqayisədə 2,8 faiz) 5,673 milyon ədədə çatıb.
2012-ci ilin müvafiq dövrünün göstəricisi ilə müqayisədə onların sayı 13,3 faiz artıb. Trend-in məlumatına görə, bu barədə Azərbaycan Mərkəzi Bankının (AMB) statistik hesabatında deyilir.
Dekabrda bankomat və POS-terminallar vasitəsilə ödəniş kartları üzrə ümumi dövriyyə 1149 milyon manat, əməliyyatların ümumi sayı isə 7,196 milyon ədəd təşkil edib.
Debet kartlar üzrə əməliyyatların ümumi sayı 5,81 milyon ədəd, dəyəri isə 946 milyon manat olub.
Ölkə daxilində debet kartlar üzrə əməliyyatların ümumi sayından bankomatlar vasitəsilə 856 milyon manat məbləğində 4,814 milyon, POS-terminallar vasitəsilə 69 milyon manat məbləğində 706 min əməliyyat yerinə yetirilib.
2013-cü ilin dekabr ayında kredit kartları üzrə 203 milyon manat məbləğində 1,380 min əməliyyat həyata keçirilib.
Hesabatda deyilir ki, kredit kartları vasitəsilə bankomatların köməyi ilə aparılan əməliyyatların ümumi həcmindən 100 milyon manat həcmində 436 min, POS-terminallar vasitəsilə isə 50 milyon manat məbləğində 724 min əməliyyat aparılıb.
2014-cü il yanvarın 1-nə olan məlumata əsasən, ölkədə 2422 bankomat fəaliyyət göstərib, onlardan 1366 ədədi Bakıda, 1056 ədədi isə ölkənin digər şəhər və rayonlarında yerləşir.
Bankomatların ümumi sayı il ərzində 162 ədəd və ya 7,2 faiz artıb.
2014-cü il yanvarın 1-nə olan məlumata görə, POS-terminalların sayı 33 285 ədəd təşkil edib ki, onlardan 28 940 ədədi Bakıda, 4 345 ədədi isə digər şəhər və rayonlarda yerləşir.
POS-terminalların sayı 2012-ci ilin dekabrına nisbətən 3575 ədəd və ya 9,7 faiz azalıb.
