Azərbaycan, Bakı, 9 sentyabr /Trend/
"AtaBank" ASC müştərilərinə xidmət səviyyəsinin yüksəldilməsi məqsədi ilə "Goldenpay" şirkəti ilə yeni əməkdaşlığa başlayıb.
Trend bankın çərşənbə axşamı yaydığı məlumata istinadən xəbər verir ki, bu əməkdaşlıq sayəsində "AtaBank" ASC-dən kredit götürən müştərilər üçün ödənişlərini daha asan və daha rahat şəkildə ödəmələrinə imkan yaradacaq layihə hazırlanıb. Yeni layihəyə əsasən bankın bütün müştəriləri hesab.az elektron xidmətlər portalından istifadə edərək istənilən vaxt ödənişlərini onlayn həyata keçirə biləcəklər.
Onlayn ödəmə sistemi müştərilərə banka gəlmədən və növbədə vaxtlarını itirmədən kredit ödənişlərini ödəmək imkanını yaradır. Bundan əlavə, onlayn ödəmə sisteminin əsas ütsünlüklərindən biri müştərilərə ödənişlərini istənilən bankın plastik kartı vasitəsi ilə reallaşdırmaq imkanının yaradıla bilməsidir.
Kreditini onlayn ödəmək istəyən müştəri hesab.az portalında müvafiq bölməyə daxil olaraq "AtaBank" bölməsini seçərək ödənişini rahat həyata keçirə bilər. İstifadəçilərin rahatlığını təmin etmək və vaxtlarına qənaət etmək məqsədi ilə portalda ödəniləcək kredit haqqında məlumatların hər dəfə sistemə yenidən daxil edilməməsi üçün "Şəxsi Kabinet" adlı xüsusi bölmə yaradılmışdır. Bu bölməyə məlumatların yalnız bir dəfə daxil edilməsi istifadəçiyə gələcəkdə qısa bir müddətdə asanlıqla kreditinin ödənilməsi imkanını yaradacaq. Bundan əlavə "Şəxsi Kabinet"də bütün ödənişlər barədə informasiya öz əksini tapacaq.
1993-cü ildən fəaliyyət göstərən "AtaBank" ASC Azərbaycanın ən böyük kommersiya strukturlarından biridir. Bu gün "AtaBank" ASC yüksək texnologiyalı, universal bankdır. Bakıda və ölkənin müxtəlif regionlarında bankın 25 filial və şöbəsi fəaliyyət göstərir. Bank korporativ və fərdi müştərilərə tam xidmət spektrini təqdim edir.