Azərbaycanın Nəqliyyat Nazirliyi Bakıda yeni respublikadaxili avtovağzalı 2006-cı ilin əvvəlində istsmara verməyi planlaşdırır. Nazirlikdən Trend ə verilən məlumata görə, hazırda layihə üzrə baş podratçı olan "Arkon" tikinti işlərini həyata keçirir və artıq işlərin 50% görülüb.
Yeni avtovağzal 2 dairəvi yol və Motodrom arasında yerləşəcək. Nazirlikdən o da qeyd edilib ki, bu, yüksək səviyyəli xidmətin göstəriləcəyi müasir avtovağzal olacaq. Layihə çərçivəsində perronların, mehmanxanaların, mağaza və digər xidmət obyektlərinin inşası nəzərdə tutulur.
Obyekt Bakı və ölkə regionları arasında sərnişin daşınmasını həyata keçirməyə imkan verəcək. Beləliklə, Bakının mərkəzində gərginlik aradan qaldırılacaq. Həmçinin, Bakını yeni avtovağazalla birləşdirən nəqliyyat sxemi işlənib hazırlanacaq.