Azərbaycanda işləyən əcnəbi vətəndaşlar 2006-cı il yanvarın 1-dən məcburi sosial sığorta üzrə ayrılmış məbləğ ödəməli olacaqlar. Bu barədə Trend ə Əhalinin sosial müdafiəsi üzrə Dövlət Fondunun büdcə-maliyyə şöbəsinin rəisi İdris İsayev bildirib. Onun sözlərinə görə, ilkin hesablamalara görə, respublikada çalışan xarici vətəndaşlar tərəfindən sosial ayrılmalardan daxilolmalar gələn il 25-30 mlrd manat təşkil edəcək. Xarici vətəndaşlar üçün məcburi sosial sığorta üzrə ayrılmış məbləğin dərəcəsi 25% təşkil edəcək. Bu zaman həmin məbləğin 22% -ni sahibkar ödəyəcək. 3% isə fəhlənin özünün əmək haqqından tutulacaq.
İ.İsayevin sözlərinə görə, ayrı-ayrı qeyri-rezidentlərin uçotunun olmaması üzündən onların konkret sayını müəyyən etmək çətindir. Bundan əlavə, "Sosial sığorta barədə" Qanundakı bu yeni qaydalar neft müqavilələri çərçivəsində işləyənlərə aid edilmir. Çünki onlar sosial sığorta üçün ayrılmış məbləğin ödənməsindən azad ediliblər.
Onun sözlərinə görə, xarici vətəndaşlardan sosial tutulmalar əmək münasibətlərindəki pozuntuları aradan qaldırmağa imkan verir.