Prezidentin fərmanı ilə yaradılmış dəniz administrasiyası öz gəmiləri olan və Xəzərdə, eləcə də digər regionlarda işləyən bütün orqanların fəaliyyətini əhatə edəcək. Bu barədə Trend ə hökumətdə bildirilib. Bu orqan Azərbaycanı beynəlxalq təşkilatlarda və xüsusilə IMO - beynəlxalq dəniz təşkilatında təmsil edəcək, eləcə də Azərbaycanda və ölkənin sərhədləri hüdudunda işləyən subyektlər arasındakı münaasibətləri tənzimləyəcək. Hökumətdə qeyd olunub ki, bu orqan xüsusilə gəmilərin Rusiyanın daxili sularından keçməsi ilə bağlı məsələləri həll edəcək.
Belə bir orqan artıq Xəzər dəniz gəmiçiliyinin bazasında mövcud olub. Amma nəqliyyat nazirliyi yaradılarkən dəniz administrasiyasının təşkili məhz bu orqana tapşırılıb.Ancaq indiyədək struktur yaradılmamışdı.
Hazırda Xəzər dəniz gəmiçiliyi - bərə, quru yükləri, tanker donanması və xüsusi gəmiləri olan öz gəmilərinə malikdir. Bundan başqa, ekologiya və təbii sərvətlər nazirliyi (tədqiqat gəmiləri), "Xəzərdənizneftdonanma" (neft şirkətlərinin dəniz əməliyyatlarının təmin edilməsi üçün təyin edilmiş gəmilər) və AR Dövlət Sərhəd Xidmətinin öz gəmiləri vardır. Özəl şirkətlərin öz balıq ovu ilə məşğul olan gəmiləri vardır.
Hökumətdə qeyd olunub ki, yaxın vaxtlarda hava administrasiyası (bu administrasiyanın təşkili də nəqliyyat nazirliyi haqqında fərmanda qeyd olunub) da yaradıla bilər. Amma bunun üçün AZAL Dövlət Konserninin strukturu yenidən qurulmalıdır.
