2006-cı il mayın 22-26-da almaniyalı sahibkarlar qrupu Azərbaycana səfər edəcək. Bu barədə Trend ə Almaniyanın Bakıdakı səfirliyinin mətbuat xidmətindən məlumat verilib.
"Hazırda qarşıdakı səfər proqramı üzərində iş gedir", - deyə səfirlikdən bildirilib.
Qeyd edək ki, aprelin 4-də Azərbaycanın qərb regionlarına səfəri zamanı Almaniyanın Azərbaycandakı səfiri Deltef Linqeman bildirib ki, alman sahibkarlarının qarşıdakı səfərində əsas diqqət Gəncədə, o cümlədən Xanlar rayonunda iqtisadi vəziyyətə yönəldiləcək.
Səfirin sözlərinə görə, səfər zamanı alman ekspertləri Xanlar rayonuna gedəcək, xüsusilə, 19-cu əsrin sonlarından Azərbaycan ərazisində yaşamış almanlar tərəfindən tikilmiş "Lüteranq" kilsəsinə baş çəkəcək. Bu kilsənin bərpası ilə bağlı məsləhətləşmələrin aparılması nəzərdə tutulur.
Qeyd edək ki, Xanlar şəhəri 19-cu əsrin sonlarında mühacir almanlar tərəfindən salınıb və ilk adı Yelenendorf olub.
