Azərbaycanın gəlirlərinin artması ilə yanaşı dövlət büdcəsinin investisiya xərcləri də artacaq. Bu barədə iqtisadi inkişaf naziri Heydər Babayev Beynəlxalq Valyuta Fondunun Mərkəzi Asiya və Yaxın Şərq üzrə Departamentinin rəhbəri Vitali Kramarenkonun başçılıq etdiyi BVF-nun missiyası ilə görüşü zamanı bəyan edib. Bunu 2006-cı il üzrə göstəricilər təsdiq edir və həmin göstəricilərə görə, 2006-cı il dövlət büdcəsinə 611 mln. AZN məbləğində dövlət investisiyası qoyulub ki, bu rəqəm 2005-ci ildə 164 mln. AZN təşkil edib.
Trend in Nazirliyin press-relizinə istinadən yaydığı xəbərə görə, görüşdə dövlət investisiya xərcləri ilə yanaşı makroiqtisadi proseslər və 2006-cı ildə əldə olunması gözlənilən nəticələr, inflayasiyanın qarşısını almaq məqsədilə hökumət tərəfindən həyata keçirilən tədbirlər, eləcə də, bu il üçün korrektə olunmuş büdcə proqnozları ilə bağlı məsələlərə də baxılıb. Nazirin sözlərinə görə, ölkə hökuməti və Milli Bank inflyasiyanın artım sürətinin nizamlanan səviyyədə qalması ilə bağlı tədbirlər görür. H.Babayev həmçinin, kommunal tariflər sahəsində uçotun təkmilləşdirilməsinin vacibliyini qeyd edib və bu istiqamətdə görülən işlər barədə BVF-nun ekspertlərini məlumatlandırıb.
BVF Azərbaycanın Ümumdünya Ticarət Təşkilatına qəbulu prosesi ilə də maraqlanıb. Onlar işçi qrupun 2006-cı il martın 26-dan 31-dək Cenevrədə ikitərəfli və çoxtərəfli əsasda ABŞ, Kanada, Türkiyə, Yaponiya və AB ilə aparılan danışıqlarda nümayiş olunan ölkənin mövqeyi barədə məlumatlandırılıblar. Artıq Azərbaycanın təkliflərini qəbul edən Gürcüstan və Moldova ilə ikitərəfli protokolların imzalanması barədə razılıq əldə olunub.
Görüşdə iki dövlət bankının - Beynəlxalq Bankın və Kapitalbankın özəlləşdirilməsi məsələsi üzrə də fikir mübadiləsi aparılıb.
