Ünvanlı sosial yardımın verilməsi üçün sənəd qəbulunun başlanmasından etibarən bir ay ərzində Əmək və Əhalinin Sosial Müdafiəsi Nazirliyinə 66 min müraciət daxil olub. Trend in xəbər verdiyi kimi, bu barədə mayın 16-da jurnalistlərlə söhbətində əmək və əhalinin sosial müdafiəsi naziri Fizuli Ələkbərov bildirib. Bunlar arasından cəmi 9,7-10 min vətəndaşın sənədi qəbul olunub. Bu proses davam edir. Əhalinin aztəminatlı təbəqəsinə ünvanlı yardımın verilməsinə isə iynun 1-dən başlanacaq.
Nazirin sözlərinə görə, ünvanlı sosial yardım sisteminə 200-250 min baş ailə cəlb oluna bilər. " Seçim xüsusi formullar əsasında vahid şərtlər üzrə aparılır və burada heç bir güzəşt olmayacaq. Bu kateqoriyaya AR-in işsiz vətəndaşları, əlillər və başqaları aid edilir. Biz əhalinin ən yoxsul və az təminatlı təbəqəsini seçəcəyik", - deyə F.Ələkbərov qeyd edib.
Prezidentin tapşırığına əsasən, ünvanlı sosial yardım kateqoriyasına düşməyən şəxslərə belə yardımın verilməsi kimi fırıldaq hallarına yol verilməməlidir. Nazir "Ünvanlı sosial yardım haqqında" və "Yaşayış minimumu haqqında" qanunların uyğunlaşdırılması zəruriliyini də bildirib. "Bu qanunlar bir-birini tamamlamalıdır. Bunun üçün Milli Məclisdə bu qanunlara dəyişiklik və əlavələrin edilməsi gözlənilir", - deyə F.Ələkbərov qeyd edib.
Ünvanlı sosial yardımın verilməsi üçün dövlət büdcəsindən 2006-cı il üçün 72 mln manat ayrılıb. Ancaq yardımın verilməsi prosesi yarım il ərzində həyata keçiriləcəyindən büdcə vəsaitinə qənaət ediləcək.
