Dünya bankının yol infrastrukturu üzrə mütəxəssisi Olivye le Berin başçılıq etdiyi bankın nəqliyyat missiyası Azərbaycanın Nəqliyyat Nazirliyi və "Yolnəqliyyatservis" departamentinin nümayəndələri ilə bir sıra görüşlər keçirib. Bu barədə Trend ə DB-nin Bakı nümayəndəliyindən mədumat verilib. Səfərdə məqsəd bankın maliyyələşdirdiyi avtomobil magistrallarının yenidən qurulması üzrə qüvvədə olan layihələrin gerçəkləşdirilməsinin icmalını aparmaqdan ibarətdir.
Bankdan bildirilib ki, görüşlərdə kompleks məsələlər müzakirə olunur. Xüsusilə Ələt-Masallı avtomobil magistralının yenidənqurulması, genişləndirilməsi və marşrutunun dəyişdirilməsi, o cümlədən Bakını respublikanın qərb rayonları ilə birləşdirən Bakı-Şamaxı-Muğanlı yolunun yenidənqurulması layihələri çərçivəsində torpağın alınması məsələsi də nəzərdən keçirilir.
DB bu yolların yenidənqurulması üçün $200 mln məbləğində kreditin ayrılmasına dair qərar qəbul edib. Bu iki layihənin gerçəkləşdirilməsi üçün çatışmayan vəsaitlər artıq 2-ci kredit çərçivəsində ayrıla bilər. Bankın missiyası ilə bu vəsaitlərin ayrılması məsələsinə və yolların yenidənqurulmasının digər aspektlərinə baxılacaq.
