Azərbaycan hökuməti 2006-cı ilin I yarımilində Beynəlxalq Valyuta Fondunun (BVF) kreditləri üzrə $21 mln. vəsaitin ödənildiyini elan edib. Maliyyə Nazirliyindən Trend ə verilən məlumata əsasən, nəticədə fonda 3 proqram (ESAF, EFF və PRGF) üzrə olan ümumi borc $150 mln. təşkil edib. Borcun ödənilməsi Milli Bankın sərəncamında olan valyuta ehtiyatları hesabına həyata keçirilir.
Fondun Azərbaycandakı daimi nümayəndəliyi 8 ildir ki, fəaliyyət göstərir. Azərbaycan hökumətilə əməkdaşlıq 1992-ci ildən, kreditləşdirmə isə 1995-ci ildən başlayıb.
Əməkdaşlıq müddətində BVF ilə Azərbaycan arasında 6 proqram üzrə sənəd imzalanıb. Bu proqramların 3-nə (STF, Stand-by və CCFF) ayrılmış kredit vəsaiti tam qaytarılıb.
Bununla əlaqədar hökumət gələcək kreditdən imtina edib. Beləliklə, fonda olan borc artmayacaq. Hökumət hətta bu kreditləri vaxtından əvvəl ödəməyə də hazırdır, lakin xarici banklardakı valyuta əmanətləri 2-2,5% arasında olduğu halda kreditlərin 0,5% dərəcəsilə verilməsi sərfəlidir. Bundan əlavə, kredit vəsaitinin yarısından çoxu artıq fonda qaytarılıb.
