Avropa Yenidənqurma və İnkişaf Bankının (AYİB) kiçik sahibkarlıq üzrə direktoru Çikako Kuno bu gün Bakıya gəlir. AYİB-in Bakı ofisindən Trend ə verilən məlumata görə, səfərdə əsas məqsəd Avropa bankı ilə "CredAgro" qeyri-bank kredit təşkilatı arasında sazişin imzalanması mərasimində iştirak etməkdir. $1 mln.-luq kredit ilkin keçid dövründə olan ölkələrdə qeyri-bank mikromaliyyə institutları sistemi çərçivəsində ayrılır.
2005-ci ildən start götürmüş bu proqramın əsas məqsədi Avropa Bankının fəaliyyət göstərdiyi ən yoxsul ölkələrdə (Azərbaycan, Ermənistan, Gürcüstan, Qırğızıstan, Moldova, Monqoliya, Tacikistan və Özbəkistan) mikromaliyyə institutlarının inkişafıdır. Bununla yanaşı, donor ölkələri onları texniki əməkdaşlıq mexanizmi ilə təmin edirlər.
Mikro və kiçik sahibkarlıq proqramı çərçivəsində AYİB Avropa, Rusiya, Mərkəzi Asiya və Qafqazda 1 mln.-dan artıq kiçik sahibkara yardım göstərib. Avropa bankı kiçik və orta sahibkarlığın maliyyələşdirilməsi sahəsində ixtisaslaşdırılmış təşkilatların yaradılması ilə regionda 84 kommersiya bankını və qeyri-bank təşkilatını maliyyələşdirib. Bu günə qədər bütövlükdə 8 mlrd. avro dəyərində kereditlərin verilməsi üçün 560 mln. avro ayrılıb.
